30-iyun – Jaslar kúni múnásibeti menen Senat Baslıǵı Tanzila Norboeva jas ilimpazlar hám innovatorlar menen ushırastı.
Ilajǵa senatorlar, Jaslar parlamenti aǵzaları, jas ilimpazlar, isbilermenler, novatorlar, startapshılar, «Bir million programmist» joybarınıń qatnasıwshıları, Jaslar akademiyası hám texnikalıq baǵdardaǵı joqarı bilimlendiriw mákemeleriniń rektorları, sonday-aq, innovaciyalıq rayon hám qalalar hákimleriniń juwapker orınbasarları jáne intaker hám belsendi jaslar qatnastı.

Senat Baslıǵı óziniń shıǵıp sóylegen sózinde jaslarǵa baylanıslı mámleketlik siyasat, sociallıq tarawdı innovaciyalıq rawajlandırıw, ilim hám ilimiy jumıstı qollap-quwatlaw, jaslar ushın jaratılıp atırǵan imkaniyatlar hám nızamshılıqtaǵı jańalıqlar haqqında aytıp ótti.
Atap ótilgenindey, sońǵı jılları jaslarǵa baylanıslı júzden aslam nızam hám nızamnan kelip shıǵatuǵın hújjetler qabıl etilgen. Joqarı bilimlendiriw mákemeleriniń sanı 3 esege artıp, jaslardıń joqarı bilimlendiriw menen qamtıp alınıwı 42 procentke jetken.
Hayal-qızlar ushın shártnama tólemlerin mámleket tárepinen qaplap beriw ámeliyatınıń engiziliwi nátiyjesinde, olardıń joqarı bilimlendiriwdegi qatnasıwı 11 esege artqan.
Sonday-aq, 1,5 mıńnan aslam qábiletli jaslar dúnyanıń abıraylı universitetlerinde bilim almaqta. «El-yurt umidi» qorı arqalı keyingi jeti jılda 2,3 mıń jaslar sırt elde oqıw imkaniyatına iye boldı.
Ilimiy dárejege iye jas ilimpazlardıń sanı 4 mıńnan artıp, 2 esege kóbeydi. Jas ilimpazlardıń ulıwma sanı derlik 11 mıńdı quramaqta.
Innovaciya hám ilim tarawlarına mámleketlik byudjetten ajıratılatuǵın qarjılar 1,5 trillion sumnan asqan. Sońǵı 4 jılda innovaciyalıq jumıstı qarjılandırıw boyınsha arnawlı institutlardıń sanı 28 den artqan. Prezident qararına muwapıq 28 rayon hám qala innovaciyalıq aymaqqa aylandırıldı hám olarda hákim orınbasarı lawazımı engizildi.
Jaslar akademiyası shólkemlestirilip, onda 4,2 mıńnan aslam qábiletli jaslar birlesken. 2022-2026-jıllarǵa mólsherlengen Innovaciyalıq rawajlanıw strategiyası sheńberinde innovaciyalıq infrastrukturalar rawajlandırılıp, jas oylap tabıwshılardıń dúnya bazarına shıǵıwına sharayat jaratılmaqta.
IT Park rezidentleriniń sanı 2025-jılǵa kelip 2,5 mıńnan astı. Startaplardıń sanı 260 tan asıp, olar arqalı 17,9 million dollarlıq investiciya tartılǵan.
2026-jılǵa shekem Ózbekstandı dúnyanıń TOP-50 innovaciyalıq mámleketleri qatarına kirgiziw, infrastruktura subektleriniń sanın 75 ke, startaplardıń sanın bolsa 1 mıń 437 ge jetkeriw belgilengen.
Ushırasıw dawamında jas ilimpazlar hám belsendi jaslar mámleketlik siyasattıń ámeldegi nátiyjeleri hám óz ómirlerindegi unamlı tásiri haqqında pikir bildirdi. Senat penen birgelikte ámelge asırılıwı múmkin bolǵan jańa joybarlar boyınsha usınıslar alǵa qoyıldı.
Qatnasıwshılar bunday ushırasıwlar dástúriy tárizde turaqlı shólkemlestiriliwinen mápdar ekenin atap ótti.

N.Abduraimova,
ÓzAnıń xabarshısı