Húrmetli delegaciyalar basshıları!

Bárinen burın, dástúriy qızǵın qabıllaǵanı hám búgingi ushırasıwımızdı joqarı dárejede shólkemlestirgeni ushın Belarus Respublikası Prezidenti húrmetli Aleksandr Grigorevich Lukashenkoǵa bildirilgen minnetdarshılıq sózlerine qosılaman.
Sonday-aq, Evroaziya ekonomikalıq awqamında Belarus tárepiniń nátiyjeli basshılıǵın, bul dáwirde kóp tárepleme ámeliy birge islesiw sezilerli dárejede jedelleskenin atap ótpekshimen.
Búgin kásipleslerimniń shıǵıp sóylewlerinde dúnya ekonomikasında júzege kelip atırǵan qıyın jaǵdayǵa baha berildi. Protekcionizm hám sankciyalar siyasatınıń kúsheyiwi, sawda-logistika shınjırlarınıń buzılıwı hám sırt elli sheriklerdiń investiciyalıq belsendiliginiń qısqarıp barıwı aqıbetleriniń unamsız tásirin biz Ózbekstanda tolıq sezip atırmız.
Biziń tábiyǵıy hám dástúriy sheriklerimiz bolǵan Evroaziya ekonomikalıq awqamı mámleketleri menen óz-ara paydalı birge islesiwdi bunnan bılay da keńeytiw hám tereńlestiriw sırtqı ekonomikalıq siyasatımızdıń tiykarǵı baǵdarlarınan biri ekenin atap ótpekshimen.
Pursattan paydalanıp, usı jıldıń basınan berli Ózbekstanda bolıp ótken «Innoprom. Oraylıq Aziya» xalıqaralıq sanaat kórgizbesi hám tórtinshi Tashkent investiciyalıq forumın qollap-quwatlaǵanı hám olardıń jumısında delegaciyalarıńız belsene qatnasqanı ushın barlıq kásipleslerime minnetdarshılıq bildiremen.
Bul ilajlardıń juwmaǵında áhmiyetli kelisimlerge erisildi, kooperaciya boyınsha jańa baǵdarlar hám perspektivalı joybarlar belgilendi. Biz mámleketlerimizdiń jáne de kóbirek jetekshi kompaniyaları hám finanslıq toparların tartqan halda, bul birge islesiw maydanların keńeytiwdi rejelestirmektemiz.
Húrmetli ilaj qatnasıwshıları!
Sizlerge Ózbekstannıń Evroaziya ekonomikalıq awqamı menen kóp tárepleme birge islesiwi qalay rawajlanıp atırǵanı haqqında qısqasha maǵlıwmat bermekshi.
Baqlawshı mámleket statusındaǵı tórt jıllıq birge islesiw dáwirinde Ózbekstannıń Evroaziya ekonomikalıq awqamı mámleketleri menen sırtqı sawda aylanısı 80 procentke ósti hám ótken jıldıń juwmaǵı boyınsha 18 milliard dollardı quradı. Sonı qanaatlanıwshılıq penen atap ótpekshimen, sawda operaciyalarınıń nomenklaturası, bárinen burın, sanaat ónimlerin jetkerip beriw esabınan keńeymekte. Birgeliktegi kárxanalar hám joybarlardıń sanı úsh esege ósti.
Usı jıldıń mart ayında Birgeliktegi jumısshı topardıń tórtinshi májilisi tabıslı ótkerilip, onıń juwmaǵında texnikalıq tosqınlıqlardı basqıshpa-basqısh saplastırıw, sanaat kooperaciyasın tereńlestiriw hám isbilermenlik baslamaların xoshametlew boyınsha kelisilgen ilajlar islep shıǵıldı.
Biz 40 anıq ilajdı qamtıp alǵan, úsh jılǵa mólsherlengen jańa rejeni ámelge asırıwǵa kiristik.
Ózbekstan, sonday-aq, Evroaziya ekonomikalıq awqamınıń áhmiyetli baslamalarında, sonıń ishinde, «Evroaziya agro ekspress», elektron sawdanı rawajlandırıw, júk tasıwdı sanlastırıw hám klimat máseleleri sıyaqlı joybar hám baǵdarlamalarda belsene qatnaspaqta.
Aprel ayında barlıq tártip-qaǵıydalardı juwmaqladıq hám Evroaziya rawajlanıw bankin shólkemlestiriw haqqındaǵı kelisimge qosıldıq. Bank penen birgelikte infrastrukturanı modernizaciyalaw, metallurgiya, toqımashılıq, ximiya tarawları hám basqa da strategiyalıq tarmaqlarda perspektivalı joybarlar portfeli islep shıǵılmaqta.
Húrmetli kásiplesler!
Evroaziya ekonomikalıq awqamı menen sheriklikti bunnan bılay da rawajlandırıwdıń áhmiyetli baǵdarların kórsetip ótpekshimen.
Biz óz-ara sawda aylanısın keńeytiw ushın qolaylı sharayatlardı qáliplestiriwge ayrıqsha áhmiyet qaratamız.
Ózbekstan mámleketlerimiz arasındaǵı erkin sawda aymaǵınıń jumısın támiyinlewge baylanıslı barlıq kelisimlerdi tolıq kólemde orınlamaqta.
Sawda operaciyaları tártip-qaǵıydaların ápiwayılastırıw hám texnikalıq tártipke salıw sistemaların jaqınlastırıwǵa qaratılǵan bir qatar usınıslarımız ekspertler tárepinen úyreniliwin tezlestiriw zárúr, dep esaplaymız.
Biz, sonday-aq, sawdanı qollap-quwatlawda texnikalıq tártipke salıwdıń sanlı sistemaları hám Awqamnıń sanlı transport koridorları ekosisteması, Evroaziya qayta qamsızlandırıw kompaniyası sıyaqlı qural hám mexanizmlerge qosılıwdan mápdarmız. Bul biziń biznesimiz ushın sharayattı sezilerli dárejede jeńillestiredi, mámleketlerimizdiń tovar bazarlarına óz-ara kiriwinde qolaylı imkaniyatlardı támiyinleydi.
Zamanagóy málimleme texnologiyaları hám jasalma intellekt jedel rawajlanıp atırǵanın esapqa alıp, sanlastırıw tarawında kóp tárepleme birge islesiw perspektivalı, dep esaplaymız.
Elektron sawda, ónimlerdiń sanlı markirovkası, jańa áwlad logistika platformaların jaratıw, anıq tarmaqlarda jasalma intellekt texnologiyaların engiziw boyınsha baǵdarlardı qamtıp alǵan ayrıqsha baǵdarlama qabıl etiwdi usınıs etemiz.
Sonday-aq, Ózbekstan ótkeriw punktleriniń birden-bir integraciyalasqan málimleme sistemasında qatnasıw imkaniyatına iye ekenin de atap ótpekshimen. Bul, bárinen burın, shegaralardan ótiwdi jedellestiriw, monitoring nátiyjeliligi hám barlıq processlerdiń ashıq-aydınlıǵın támiyinlew imkaniyatın beredi.
Texnikalıq jaqtan biz bunday joybarlarda belsene qatnasıwǵa tayarmız.
Kooperaciya baylanısların rawajlandırıwdı xoshametlew ushın kishi hám orta biznesti qollap-quwatlaw boyınsha iske qosılǵan baǵdarlamalar, sonıń ishinde, Evroaziya ekonomikalıq awqamı Isbilermenler keńesi menen birgeliktegi ilajlar sheńberinde ámeliy birge islesiwdi keńeytiwdi usınıs etemiz.
Sanaat tarawındaǵı joybarlardı qarjılay qollap-quwatlaw mexanizmi jáne sanaat kooperaciyası hám texnologiyalar transferi boyınsha Evroaziya tarmaǵı platforması imkaniyatlarınan paydalanıwdan mápdarmız.
Azıq-awqat qáwipsizligin támiyinlew tarawında awıl xojalıǵı ónimlerin islep shıǵarıwshılardıń birge islesiwi ushın imkaniyatlardı keńeytiwge qaratılǵan ilajlardı islep shıǵıwda háreketlerdi birlestiriw áhmiyetli. Bul jerde sóz, bárinen burın, Ózbekstannıń Evroaziya ekonomikalıq awqamı mámleketleri menen agrokooperaciya baǵdarlamasın qabıl etiw haqqındaǵı baslamamızdı ámelge asırıw haqqında barmaqta. Bul baǵdarlama aldıńǵı texnologiyalardı engiziw, awıl xojalıǵı ónimleriniń háreketleniw tártiplerin ápiwayılastırıw, «jasıl» koridorlardıń nátiyjeli jumısı hám olardı keńeytiwdi názerde tutadı.
Evroaziya ekonomikalıq awqamındaǵı sheriklerimiz benen birgelikte miynet resursları tártip-qaǵıydaların ápiwayılastırıw hám mobilizaciyasın arttırıw boyınsha jedel jumıs alıp barmaqtamız. Usı múnásibet penen miynet bazarında talap úlken bolǵan tarawlarda professional standartlar hám mamanlıq talapların jaqınlastırıw máseleleri boyınsha ekspertler másláhátlesiwlerin ótkeriwdi usınıs etemiz.
Eger kásipleslerimiz qollap-quwatlasa, biz Shólkem sheńberinde engizilgen «Shegara bilmes jumıs» integraciyalasqan platformasına da qosılamız.
Húrmetli delegaciyalar basshıları!
Sózimniń juwmaǵında Evroaziya ekonomikalıq awqamı sheńberinde biz ámeliy birge islesiwdi keńeytiwge sadıq ekenimizdi jáne bir márte tastıyıqlayman.
Ózbekstannıń joqarıda atap ótilgen kóp tárepleme baǵdarlama hám joybarlarda qatnasıwı ekonomikalıq sheriklikti bekkemlewge xızmet etetuǵınına hám búgingi sharayatta mámleketlerimizdiń turaqlı rawajlanıwına imkaniyat beretuǵınına bekkem isenemen.