Ózbekstan Respublikası Prezidenti Shavkat Mirziyoev 29-iyun kúni bolıp ótken telefon arqalı sóylesiwde Túrkmen xalqınıń milliy jetekshisi, Xalıq Másláháti Baslıǵı Gurbanguli Berdimuhamedovtı tuwılǵan kúni menen qızǵın qutlıqlap, oǵan bekkem densawlıq, shańaraqlıq baxıt-ıǵbal, tuwısqan Túrkmenstanǵa tınıshlıq-tatıwlıq hám rawajlanıw tiledi.

Mámleketimiz basshısı Gurbanguli Berdimuhamedovtıń zamanagóy Túrkmenstandı qurıw hám izbe-iz rawajlandırıw, mámlekettiń xalıqaralıq abırayın arttırıw, Ózbekstan menen Túrkmenstan arasındaǵı doslıq, jaqsı qońsıshılıq hám strategiyalıq sheriklik qatnasıqların bekkemlewge qosqan jeke úlesin ayrıqsha atap ótti.
Túrkmen xalqınıń milliy jetekshisi Ózbekstan Prezidentine Túrkmenstan Prezidenti Serdar Berdimuhamedovtıń sálemin jetkerdi.
Sońǵı jılları, bárinen burın, mámleketlerimiz jetekshileriniń turaqlı ushırasıwları sebepli eki tárepleme birge islesiwde misli kórilmegen joqarı dárejege erisilgeni ayrıqsha qanaatlanıwshılıq penen atap ótildi.
Uyımlar arasında tıǵız hám nátiyjeli baylanıslar jolǵa qoyılǵan, tovar almasıw hám júk tasıw kólemi artpaqta. Áhmiyetli kooperaciya joybarları ámelge asırılmaqta, sonıń ishinde, “Shavat – Tashawız” shegaraaldı sawda zonasınıń qurılısı juwmaqlanbaqta. Jedel mádeniy-gumanitarlıq almasıwlar ámelge asırılmaqta. Birgeliktegi Húkimetleraralıq komissiya hám Isbilermenler keńesiniń gezektegi májilisleri, Aymaqlararalıq forumdı ótkeriw rejelestirilgen.
Regionallıq birge islesiwdiń áhmiyetli tárepleri, sonıń ishinde, usı jılı sentyabr ayında Tashkent qalasında ótkeriletuǵın Oraylıq Aziya mámleketleri basshılarınıń jetinshi Másláhát ushırasıwına tayarlıq kóriw máseleleri de kórip shıǵıldı.

ÓzA