Qaraqalpaqstan Respublikası Joqarǵı Keńesiniń Baslıǵı Amanbay Orınbaev «Jaslar aylıǵı» sheńberinde Xojeli, Shomanay, Qanlıkól, Moynaq, Beruniy hám Ellikqala rayonlarında belsendi jaslar menen ushırasıw ótkerdi.

Ushırasıwlar sheńberinde málimleme texnologiyaları, sanlı xızmetler, startaplardı rawajlandırıw, xalıqaralıq grant qarjıların tartıw hám jaslar isbilermenligin qollap-quwatlaw máseleleri boyınsha tiyisli shólkemler menen qánigelerdiń qatnasıwında maǵlıwmatlar hám prezentaciyalar usınıldı.
Onda mámleketimiz basshısınıń baslamaları menen jaslarǵa jaratılıp atırǵan imkaniyatlar, olardıń bilim alıwı, kásip iyelewi, óz ideyaların ámelge asırıwı ushın jaratılıp atırǵan sharayatlar haqqında maǵlıwmatlar berildi. Sonday-aq, bul imkaniyatlardan paydalanıp, joqarı nátiyjelerge erisip kiyatırǵan jaslardıń sanı artıp atırǵanı atap ótildi.
Jańasha formatta ótken ushırasıwlarda jaslar tárepinen bilimlendiriw, IT tarawı, isbilermenlik jumısın keńeytiw sıyaqlı bir qatar usınıs hám baslamalar bildirildi. Kóterilgen máseleler dizimge alınıp, tiyisli taraw basshılarına tapsırmalar berildi.
Jaslar, óz gezeginde, Prezidentimiz tárepinen jaratılıp atırǵan imkaniyatlar hám kórsetilip atırǵan itibar ushın minnetdarshılıq bildirdi.
Sonday-aq, hár qıylı tarawlarda belsendiligi menen ajıralıp turǵan bir topar jaslar Qaraqalpaqstan Respublikası Joqarǵı Keńesi Prezidiumınıń qararına muwapıq sıylıqlandı.

Qaraqalpaqstan xabar agentligi