Túrkiyanıń Stambul qalasında Islam birge islesiw shólkemi (IBSh) Sırtqı isler ministrleri keńesiniń 51-sessiyası bolıp ótti.
“Islam birge islesiw shólkemi dúnya ózgeriwi sharayatında” súreni astında ótkerilgen ilajǵa IBShǵa aǵza mámleketlerdiń sırtqı isler ministrleri, IBSh basshılıǵı hám strukturaları, sonday-aq, xalıqaralıq shólkemler, ilimiy-izertlew orayları, diplomatiyalıq korpus wákilleri qatnastı.

Sammit dawamında IBSh kún tártibindegi áhmiyetli máseleler dodalandı, Stambul deklaraciyası qabıl etildi.
Sessiyanıń tiykarǵı nátiyjelerinen biri, 2025-2028-jıllarǵa mólsherlengen múddetke IBSh Insan huqıqları boyınsha ǵárezsiz turaqlı komissiyasınıń toǵız jańa aǵzasınıń saylawı ótkerilgenligi bolıp tabıladı.
Dawıs beriw nátiyjelerine bola, Ózbekstan wákili – Insan huqıqları boyınsha Ózbekstan Respublikası Milliy orayı direktorınıń birinshi orınbasarı, professor Mirzatillo Tillaboev úsh jıl múddetke IBSh Insan huqıqları boyınsha biyǵárez turaqlı komissiyasınıń aǵzası etip saylandı.
Bul waqıya Ózbekstannıń insan huqıqları tarawındaǵı xalıqaralıq diplomatiyada iyelep atırǵan ornı barǵan sayın artıp atırǵanın jáne bir márte tastıyıqlaydı. Mámleketimizdiń kóp tárepleme birge islesiw, islam tileklesligi hám tiykarǵı erkinliklerdi qorǵaw principlerine sadıqlıǵın kórsetedi.
Bunnan tısqarı, bul nátiyje Ózbekstannıń insan huqıqları boyınsha xalıqaralıq institutlar menen óz-ara birge islesiwindegi áhmiyetli basqısh bolıp, IBShǵa aǵza mámleketlerdiń mámlekette ámelge asırılıp atırǵan reformalarǵa bolǵan iseniminen dárek beredi.
Insan huqıqları boyınsha ǵárezsiz turaqlı komissiya IBShnıń insan huqıqları tarawındaǵı tiykarǵı ekspert uyımı bolıp esaplanadı. Bul komissiya 2011-jılı shólkemlestirilgen bolıp, úsh jıl múddetke saylanatuǵın 18 aǵzadan ibarat.
Komissiya IBShǵa puqaralıq hám siyasiy huqıqlar, sociallıq ádillik, azshılıqlar huqıqların qorǵaw, hayal-qızlardıń huqıqları menen imkaniyatların keńeytiw, diniy keńpeyillik hám adamgershilik mashqalaları boyınsha keń kólemli máseleler boyınsha másláhátler beredi.
IBSh Sırtqı isler ministrleri keńesiniń 51-sessiyası qararında Insan huqıqları boyınsha ǵárezsiz turaqlı komissiya jumısınıń tiykarǵı baǵdarları belgilendi. Bul jerde, sonıń ishinde, Palestina xalqınıń huqıqların qorǵaw, islamafobiyaǵa qarsı gúresiw, hayal-qızlar hám balalar huqıqların alǵa qoyıw, diniy keńpeyillikti támiyinlew hám dúnyada júz berip atırǵan waqıyalarǵa adamgershilik penen múnásibette bolıw máseleleri haqqında sóz bolmaqta.
Sessiya qararında sáwlelengen áhmiyetli waqıyalar qatarında 2024-jıl iyun ayında Ózbekstan tárepinen shólkemlestirilgen Insan huqıqları boyınsha IV Samarqand forumı da ayrıqsha atap ótilgen. Forum mısalında mámleketimiz insan huqıqları boyınsha global qarım-qatnastı rawajlandırıwǵa múnásip úles qosqanı atap ótilgen.
Ózbekstannıń aǵzalıǵı IBSh komissiyasınıń jumısına Oraylıq Aziya regionı tárepinen de múnásip úles qosılıwı imkaniyatın beredi. Bul waqıya, sonday-aq, IBShǵa aǵza mámleketler menen nızamshılıqtı jetilistiriw, institucionallıq rawajlanıw, insan huqıqlarına tiykarlanǵan basqarıw hám bilimlendiriw sıyaqlı tarawlarda birge islesiwdi tereńlestiriw ushın qosımsha imkaniyatlar ashadı.

N.Abduraimova, ÓzA