Mongoliya paytaxtı Ulan-Bator qalasında mámleket notariat sisteması shólkemlestirilgenine 100 jıl tolıwı múnásibeti menen saltanatlı ilajlar bolıp ótpekte.

25-28-iyun kúnleri ilajlar sheńberinde xalıqaralıq ushırasıwlar hám konferenciyalar shólkemlestirildi, olar notariat tarawındaǵı kóplegen xalıqaralıq qánigeler hám shólkemlerdi birlestirdi.
Ilajlar sheńberinde Xalıqaralıq notariuslar awqamı (XNA) Aziya isleri komissiyasınıń 15-jalpı májilisi hám tarawǵa baylanıslı bir qatar áhmiyetli temalarda ushırasıwlar bolıp ótti. Olarda Ózbekstannan Notarial palata baslıǵı Dilshod Ashurov basshılıǵındaǵı delegaciya da belsene qatnastı.
Ilajlar xalıqaralıq konferenciya menen baslandı. Onda “Notariat tarawında nızamshılıqtı jetilistiriw tendenciyaları” atamasında bayanatlar tıńlandı. Sonıń ishinde, Dilshod Ashurov “Ózbekstan notariusları tárepinen mediaciyanı ámelge asırıw ámeliyatı” atamasında prezentaciya ótkerdi.
Mediaciya tarawında hár qıylı mámleketlerdiń tájiriybesi hám kózqarasları dodalandı.
Keyingi kúni XNA Aziya isleri komissiyasınıń 15-jalpı májilisi bolıp ótti. Onda komissiyaǵa aǵza mámleketlerdiń wákilleri 2024-2025-jıllarda ámelge asırılǵan jumıslar boyınsha esabat berdi. Májilis dawamında basqarıw sisteması hám wákillik múddetlerine ózgerisler kirgizildi hám jańa basshılardıń kandidaturaları belgilendi.
Sonday-aq, Ózbekstan delegaciyası tárepinen “Aralıqtan notarial háreketlerdi huqıqıy tártipke salıw hám ámelde engiziw” temasında prezentaciya usınıldı. Onda sanlı notariat xızmetlerin engiziw boyınsha ámeliy jumıslar bayan etildi.
Bunday xalıqaralıq forumlarda qatnasıw notariat tarawında birge islesiwdi bekkemlew, tájiriybe almasıw hám aldıńǵı ámeliyatlardı engiziwge xızmet etedi.
Ilajlar juwmaǵında Mongoliya Notarial palatasınıń baslıǵına estelik sawǵaları tapsırıldı.

ÓzA