Ózbekstan Respublikası Prezidentiniń pármanı

Sońǵı jılları xalıq hákimiyatshılıǵın tolıq ámelge asırıw baǵdarında ámelge asırılǵan keń kólemli reformalar, atap aytqanda, xalıq deputatları jergilikli Keńesleriniń (keyingi orınlarda – jergilikli Keńesler) aymaqlardı sociallıq-ekonomikalıq rawajlandırıw, xalıqtı táshwishke salıp atırǵan áhmiyetli máselelerdi sheshiw boyınsha wákillikleriniń jetilistirilip atırǵanlıǵın, sonday-aq, jańalanǵan Konstituciyada jergilikli Keńes baslıǵı hám hákim lawazımlarınıń bir-birinen ajıratılıwı belgilengenliginen kelip shıǵıp, “Kúshli Keńes, esap beriwshi hám intaker hákim” principin ámelge asırıw maqsetinde qarar etemen:
I. Maqsetler
1. Usı Pármandı qabıl etiwden gózlengen tiykarǵı maqsetler etip tómendegiler belgilensin:
a) jergilikli dárejede xalıq hákimiyatshılıǵın tolıq ámelge asırıw, sonıń ishinde, jámiyetlik hám mámleketlik turmıstıń áhmiyetli máselelerin sheshiwde jergilikli mámleketlik hákimiyat wákillikli uyımlarınıń rolin arttırıw;
b) puqaralardıń jergilikli basqarıwda keńnen qatnasıwına baylanıslı demokratiyalastırıw processlerin bekkemlew, atqarıw hákimiyatı uyımlarınıń jergilikli xalıq wákilleri aldındaǵı esap beriwin arttırıw;
v) aymaqlıq basqarıwdı “xalıq máplerine xızmet etiw” principi tiykarında oraylastırıw hám Xalıq deputatları wálayatlar hám Tashkent qalalıq Keńesleri jáne rayonlıq hám qalalıq Keńesleriniń wákilliklerin teńdey bólistiriw, hár bir buwındaǵı jergilikli mámleketlik hákimiyat wákillikli uyımlarınıń wazıypaları hám funkciyaların anıq belgilew;
g) aymaqlararalıq sawda-ekonomikalıq hám mádeniy-gumanitarlıq baylanıslardı kúsheytiw maqsetinde jergilikli mámleketlik hákimiyat wákillikli uyımlarınıń xalıqaralıq birge islesiwiniń huqıqıy tiykarların bekkemlew.
II. Programmalıq hújjetler hám olardı ámelge asırıw mexanizmleri
2. Tómendegiler:
a) Ózbekstan Respublikasında jergilikli mámleketlik hákimiyat wákillikli uyımlarınıń jumısın 2030-jılǵa shekem rawajlandırıw koncepciyası (keyingi orınlarda – Koncepciya) 1-qosımshaǵa muwapıq;
b) Ózbekstan Respublikasında jergilikli mámleketlik hákimiyat wákillikli uyımlarınıń jumısın 2030-jılǵa shekem rawajlandırıw koncepciyasın ámelge asırıw boyınsha “jol kartası” 2-qosımshaǵa muwapıq tastıyıqlansın.
3. Jergilikli mámleketlik hákimiyat wákillikli uyımlarınıń intakerligin bunnan bılay da arttırıw maqsetinde tómendegi wákilliklerdi Xalıq deputatları jergilikli Keńeslerine ótkeriw boyınsha usınıslarǵa kelisim berilsin:
a) mámleketlik kóshpes múlkten paydalanǵanı ushın ijara tóleminiń eń az stavkaların belgilew;
b) jerlew orınların saqlaw qaǵıydaların hám jerlew xızmetlerin kórsetiw boyınsha tariflerdiń muǵdarın tastıyıqlaw;
v) sociallıq qorǵawǵa mútáj, jumıs tabıwda qıyınshılıq kórip atırǵan hám miynet bazarında teń shártlerde básekilese almaytuǵın shaxslardı jumısqa jaylastırıw ushın jumıs orınlarınıń eń az sanın belgilew hám rezervke qoyıw;
g) jollardıń ayırım bólimlerinde háreketleniw tezligin asırıwǵa yaki azaytıwǵa (tiyisli jol belgileri ornatıp) ruxsat beriw.
4. Tómendegiler:
a) byudjet joybarın islep shıǵıwda jergilikli byudjet qárejetleriniń belgili bir bólegin jergilikli Keńes deputatlarınıń tikkeley baslaması tiykarında qáliplestiriw ámeliyatı jolǵa qoyıladı;
b) Oliy Majlis palataları janındaǵı jaslar parlamentleri tájiriybesinen kelip shıqqan halda, jámiyetshilik tiykarında jergilikli Keńesler janında Jaslar toparları shólkemlestiriledi;
v) jergilikli Keńes janında mámleketlik emes kommerciyalıq emes shólkemler, puqaralardıń ózin-ózi basqarıw uyımları, puqaralıq jámiyetiniń basqa da institutları hám ilimiy toparlardıń wákillerinen ibarat jámiyetshilik tiykarında jumıs alıp baratuǵın Másláhát toparları shólkemlestiriledi;
g) jergilikli Keńesler sekretariatlarınıń jumısın shólkemlestiriw jaǵınan qollap-quwatlaw maqsetinde Xalıq deputatları wálayatlar hám Tashkent qalalıq Keńeslerinde jergilikli atqarıw hákimiyatı uyımlarınan biyǵárez qarjılay esap-sanaq sisteması engiziledi;
d) Xalıq deputatları jergilikli Keńesi baslıǵınıń orınbasarı institutı shólkemlestiriledi.
5. Koncepciya sheńberinde tómendegi usınıslardı ámelge asırıwǵa kelisim berilsin:
a) wálayat, Tashkent qalası, rayon (qala) hákimi orınbasarlarına talabanlardı tiyisli jergilikli Keńeslerdiń turaqlı komissiyalarında dáslepki tárizde dodalaw, Keńes sessiyalarında talabanlar tárepinen óz baǵdarları boyınsha aymaqtı rawajlandırıw baǵdarlamaların usınıw tártibin engiziw;
b) jergilikli Keńeslerde deputatlar hám jámiyetshilik wákilleriniń qatnasıwında jergilikli atqarıw hákimiyatı uyımları basshılarınıń ayırım áhmiyetli sociallıq máseleler boyınsha málimlemelerin tıńlaw boyınsha “Keńes saatı” institutın engiziw;
v) jergilikli Keńeslerdiń jumısın shólkemlestiriw-qarjılay jaqtan qollap-quwatlaw máselelerin jergilikli byudjet parametrlerinde ayrıqsha kórsetiw arqalı miynetke haqı tólew, xoshametlew, materiallıq-texnikalıq bazasın bekkemlew shártlerin jergilikli atqarıw hákimiyatı dárejesinen tómen bolmaǵan halda belgilew;
g) jergilikli Keńeslerdiń Reglament hám deputatlıq ádep máseleleri boyınsha turaqlı komissiyalarına Keńes qararı menen lawazımǵa tastıyıqlanatuǵın, tayınlanatuǵın, lawazımǵa tayınlanıwında Keńes kelisimi alınatuǵın lawazımlı shaxslar tárepinen ádep-ikramlılıq normalarınıń buzılǵanlıǵı boyınsha islerdi kórip shıǵıw huqıqın beriw;
d) Jergilikli Keńes qararların qabıl etiw processleriniń ashıq-aydınlıǵın támiyinlew maqsetinde puqaralardıń sessiya jumısın tikkeley baqlaw imkaniyatın jaratıw. Onda jergilikli Keńes sessiyalarında puqaralardıń sessiya jumısına aralasıw huqıqısız baqlawshı sıpatında qatnasıw tártibin belgilew.
III. Informaciya hám programmalıq támiynat
6. Sanlı texnologiyalar ministrligi basqıshpa-basqısh “E-Kengash” elektron platformasın “qolaylıq – ápiwayılıq – qáwipsizlik” principi tiykarında turaqlı jetilistirip barsın. Onda “E-Kengash” elektron platformasında tómendegi tiykarǵı imkaniyatlar bolıwı názerde tutılsın:
a) jergilikli Keńeslerdiń jumısına baylanıslı hújjetlerdi qáwipsiz elektron arxiv platformasında (blockchain) saqlaw imkaniyatın engiziw;
b) úlken kólemli maǵlıwmatlar menen islesiwde toplanǵan úlgi hújjetler, analitikalıq maǵlıwmat, esabat hám málimlemeden paydalanıwdı jolǵa qoyıw arqalı qarar joybarların islep shıǵıw procesinde operativlik hám qolaylılıq jaratıw;
v) “E-Kengash” elektron platformasın hár qıylı sırtqı qáwiplerden qorǵaw, málimleme qáwipsizligin támiyinlew hám kiberhújimlerdiń aldın alıw kózqarasınan jetilistiriw;
g) “E-Kengash” elektron platformasında hújjetlerdi tastıyıqlaw hám qol qoyıwda Keńes baslıǵın biometrikalıq identifikaciyalaw (Face ID) texnologiyaların engiziw;
d) jasalma intellekt texnologiyaları tiykarında jergilikli Keńeslerdiń qarar joybarların tayarlaw hám huqıqıy ekspertizadan ótkeriw.
IV. Pármannıń orınlanıwın shólkemlestiriw, támiyinlew hám qadaǵalaw
7. Ózbekstan Respublikası Oliy Majlisi Senatına Ózbekstan Respublikasında jergilikli mámleketlik hákimiyat wákillikli uyımlarınıń jumısın 2030-jılǵa shekem rawajlandırıw koncepciyasın ámelge asırıw boyınsha “jol kartası”nıń óz waqtında hám sapalı ámelge asırılıwın dodalap barıw usınıs etilsin.
8. Ádillik ministrligi mápdar ministrlikler hám uyımlar menen birgelikte eki ay múddette usı Pármannan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin.
9. Ózbekstan Respublikası Prezidenti Administraciyası janındaǵı Málimleme hám ǵalaba kommunikaciyalar agentligi, Ózbekstan Milliy málimleme agentligi hám Ózbekstan Milliy teleradiokompaniyası usı Koncepciya sheńberinde ámelge asırılatuǵın jumıslardı ǵalaba xabar qurallarında keńnen sáwlelendirip barsın.
10. Usı Pármannıń orınlanıwın qadaǵalaw Ózbekstan Respublikasınıń Bas ministri A.N.Aripovqa júklensin.

Ózbekstan Respublikası
Prezidenti Sh.MIRZIYoEV

Tashkent qalası,
2025-jıl 23-iyun