Ellikqala rayonındaǵı “Taza baǵ” awıl puqaraları tárepinen alǵa qoyılǵan baslama, joqarı dárejedegi puqaralıq belsendiligi hám awızbirshilik sebepli xalıq ushın áhmiyetli bolǵan jol joybarı ámelge asırılmaqta, – dep maǵlıwmat beredi rayon hákimligi Málimleme xızmeti bólimi.

Atap aytqanda, “Taza baǵ” awıl puqaralar jıyını aymaǵınan 7-mektep arqalı “Imomjon ota” qoyımshılıǵına shekemgi 1 kilometr 546 metr aralıqtaǵı joldı asfaltlaw joybarı 2025-jıl 1-máwsim “Baslamalı byudjet” baǵdarlaması sheńberinde 4 mıń 647 puqaranıń dawısı menen jeńimpaz dep tabıldı.
Joybardıń ulıwma bahası 1,5 milliard sumdı qurap, usı qarjılar arqalı aymaqta jol infrastrukturasın jaqsılaw hám xalıq ushın qolaylı sharayat jaratıw maqset etilgen.
Qurılıs jumısları Qaraqalpaqstan Respublikası kólemindegi Jollar boyınsha Buyırtpashı xızmeti mámleketlik mákemesi buyırtpashılıǵında “Shobboz tosh” JShJ tárepinen ámelge asırılmaqta.
Bul joybar awıl xalqınıń kúndelikli turmısın jeńillestirip ǵana qoymastan, al puqaralardıń baslaması hám qatnasın qollap-quwatlaw jolındaǵı jáne bir tabıslı qádem sıpatında tán alınbaqta.

Qaraqalpaqstan xabar agentligi