Prezident Shavkat Mirziyoev 23-iyun kúni iri sanaat kárxanaların “jasıl” energiya menen támiyinlew ilajlarına baylanıslı prezentaciya menen tanıstı.

Mámleketimiz ekonomikasın turaqlı energiya dárekleri menen támiyinlew maqsetinde “jasıl” energetika jedel rawajlandırılmaqta. Qısqa dáwirde bul tarawǵa derlik 6 milliard dollar tikkeley sırt el investiciyası kirip keldi. Jıllıq elektr energiyasın islep shıǵarıw kólemi aldınǵı 59 milliardtan házirgi waqıtta 82 milliard kilovatt saatqa jetti.
2030-jılǵa barıp, elimiz xalqı 41 millionnan, ekonomika kólemi 200 milliard dollardan artıwı kútilmekte. Bul, álbette, elektr energiyasına qosımsha talap payda etedi. Sonıń ushın qayta tikleniwshi energiya dáreklerin keńnen iske qosıw ilajları kórilmekte.
Prezentaciyada usı jılı ámelge asırılıp atırǵan joybarlar hám jaqın keleshektegi rejeler haqqında málimleme berildi. Olardan tiykarǵı maqset generaciya, modernizaciya hám energiya nátiyjeliligi bolıp esaplanadı.
Atap aytqanda, jıldıń aqırına shekem 12 quyash hám 4 samal elektr stanciyası, 12 energiyanı saqlaw sisteması iske qosıladı. Olarǵa ulıwma investiciya kólemi 5 milliard dollardan aslam bolıp, derlik 9 milliard kilovatt-saat quwatlılıqqa iye boladı. Sonday-aq, usı jılı ulıwma bahası 7 milliard 200 million dollarlıq jáne 11 joybardıń qurılısı baslanadı.
Energiyanı tek ǵana islep shıǵarıw emes, al únemlew de júdá áhmiyetli. Mámleketimiz basshısı tárepinen energiya shıǵınların azaytıw, ásirese, iri sanaat kárxanalarında únemlewshi úskeneler ornatıw wazıypası qoyılǵan.
Elimizde jámi elektr tutınıwınıń úshten bir bólegi 18 tarmaqqa tuwra keledi. Máselen, suw xojalıǵındaǵı nasoslarǵa jılına 6,5 milliard kilovatt saat elektr jumsalıp atır.
Sol sebepli 12 iri nasostı modernizaciyalap, hár birine 75-100 megavattlı quyash stanciyası hám 50 megavattlı saqlaw qurılmasın ornatıw wazıypası belgilendi. Nátiyjede nasoslardıń elektr jumsalıwı jılına 2 milliard kilovatt-saatqa azayıp, 4,5 milliard kilovattqa túsedi. Bul jumıslar, bárinen burın, suw shıǵarıwdıń ózine túser bahası joqarı bolǵan Qarshı magistral kanalınan baslanadı.
Neft-gaz kárxanalarında da 240 megavattlı quyash stanciyası hám 300 megavattlı saqlaw qurılmaların ornatıp, keminde 600 million kilovatt-saat elektr alıw imkaniyatı bar.
Ulıwma, májiliste elektr tutınıwı joqarı 18 tarmaqtı ózin-ózi energiya menen támiyinleytuǵın sistemaǵa ótkeriw ilajları dodalandı. Sociallıq mákemelerde quyash energiyasınan paydalanıw baǵdarındaǵı jumıslar haqqında da málimleme berildi.

ÓzA