Ózbestan Respublikası Prezidenti Shavkat Mirziyoev 23-iyun kúni Malayziya Bas ministri Fadilloh bir Yusuf basshılıǵındaǵı delegaciyanı qabılladı.

Malayziyanıń abıraylı delegaciyası eki tárepleme sóylesiwler ótkeriw hám Samarqand qalasındaǵı Birlesken Milletler Shólkeminiń Mámleketlik xızmet boyınsha forumında qatnasıw ushın rásmiy sapar menen mámleketimizde bolıp tur.
Ushırasıw aldınan Fadilloh bin Yusuf mámleketimiz basshısına Bas ministr Anvar Ibrohimniń sálemi hám eń jaqsı tileklerin jetkerdi.
Ózbekstan – Malayziya kóp táreplemeli qatnasıqların usı jıl fevral ayında Kuala-Lumpurga ámelge asırılǵan joqarı dárejedegi saparda erisilgen kelisimler sheńberinde jáne de keńeytiw máseleleri kórip shıǵıldı.
Hár qıylı dárejelerdegi baylanıslar, saparlar hám almasıwlardıń jedelleskeni úlken qanaatlanıwshılıq penen atap ótildi. Usı jıldıń basınan tovar almasıw kólemi 25 procentke arttı. Birgeliktegi kárxanalardıń sanı hám aviaqatnawlar kóbeydi. Erteń eki mámleket jetekshi kompaniyalarınıń qatnasıwında biznes forumı bolıp ótedi.
Ekonomikalıq birge islesiwde bar potencialdı júzege shıǵarıw hám sawda, innovaciyalar, “jasıl” energetika, neft-gaz hám ximiya, geologiya, suw resursların basqarıw, elektroenergetika hám yarımótkizgishler sanaatı, densawlıqtı saqlaw, kadrlar tayarlaw, zıyarat turizmin rawajlandırıw hám basqa da tiykarǵı baǵdarlarda kooperaciya joybarların jedel alǵa qoyıw áhmiyetli ekenligi atap ótildi.

Qaraqalpaqstan xabar agentligi