Usı jıldıń 20-iyun kúni Sankt-Peterburg xalıqaralıq ekonomikalıq forumı sheńberinde “Rosatom” mámleketlik korporaciyası hám “Ózatom” agentligi arasında áhmiyetli strategiyalıq kelisimge qol qoyıldı. Bul haqqında agentliktiń málimleme xızmeti xabar berdi.

Kelisim Ózbekstanda úlken quwatlılıqtaǵı atom elektr stanciyasın qurıw imkaniyatların úyreniwdi názerde tutadı.
Hújjetke muwapıq, eki tárep eki “VVER-1000” reaktorlı energoblok qurıw máselesin dodaladı. Keleshekte bul kólem tórt blogqa shekem keńeytiliwi múmkin. Joybar Rossiyada hám sırt elde ózin aqlaǵan qáwipsiz hám nátiyjeli texnologiyalarǵa tiykarlanadı.
Qol qoyıw máresiminde “Rosatom” mámleketlik korporaciyasınıń bas direktorı Aleksey Lixachyov hám “Ózatom” agentliginiń direktorı Azim Ahmedxwjaev qatnastı.
Hújjet Rossiya Prezidenti Vladimir Putinniń 2024-jıl 27-maydaǵı rásmiy saparı sheńberinde hám 2025-jıl 28-aprel kúni Ózbekstan Prezidenti Shavkat Mirziyoev penen ótkerilgen sóylesiwler waqtında erisilgen kelisimlerdiń logikalıq dawamı boldı.
Lixachyovtıń kózqaraslarına bola, Jizzaq wálayatında kishi quwatlılıqtaǵı AES qurılısı menen birge, “VVER-1000” reaktorlı iri kólemli stanciya joybarı arqalı mámlekette uglerodsız energetika klasteri jaratıladı. Bul infrastruktura tek ǵana elektr támiynatındaǵı talaplardı qaplap qoymastan, al Ózbekstanda sanaat hám innovaciyalıq tarawlardı rawajlandırıw ushın tiykar jaratadı.
Azim Ahmedxwjaevtıń atap ótkenindey, joybardı ámelge asırıwdıń texnikalıq-ekonomikalıq tiykarların úyreniw ushın birgeliktegi Jumısshı topar dúzilgen. Házirgi waqıtta birinshi energoblok ushın zárúr reaktor úskenelerin islep shıǵarıw baslanǵan.
Jumısshı topardıń juwmaqları tiykarında úlken quwatlılıqtaǵı AES qurılısı boyınsha juwmaqlawshı qarar qabıl etiledi. Bul qarar joybardı ámeliy basqıshqa alıp shıǵıwda sheshiwshi áhmiyetke iye boladı.

N. Ziyodullaeva ÓzAnıń xabarshısı