Prezident Shavkat Mirziyoev xalıqtıń turmısı, aymaqlardıń ekonomikalıq rawajlanıwı hám jańa joybarlar menen tanısıw maqsetinde 18-iyun kúni Tashkent wálayatınıń Parkent rayonına bardı hám “Tashkent-Shıǵıs” aeroportınıń qurılısın kózden ótkerdi.

Mámlekettiń turaqlı rawajlanıwı hám onıń xalıqaralıq tartımlılıǵınıń artıwı menen sırtqı ekonomikalıq baylanıslar jedellesip, investiciyalar aǵımı kóbeymekte. Bunday sharayatta Ózbekstanda transport infrastrukturasınıń barlıq baǵdarların modernizaciyalawǵa ósiwdiń tiykarǵı faktorı sıpatında ayrıqsha áhmiyet qaratılmaqta.
Mine, usınday strategiyalıq joybarlardan biri “Tashkent-Shıǵıs” aeroportın rekonstrukciyalaw bolıp esaplanadı. Ol joqarı xalıqaralıq standartlarǵa juwap beretuǵın tez, qáwipsiz hám qolaylı qatnawlardı támiyinlew, sonday-aq, paytaxttıń tiykarǵı xalıqaralıq aeroportına júklemeni jeńilletiwge mólsherlengen.
Bárinen burın, 4 kilometr uzınlıqtaǵı ushıw-qonıw jolı jańalanıp, eń awır samolyotlardı da qabıl etiw quwatlılıǵına iye boldı.
Házirgi kúnde joqarı mártebeli miymanlar hám biznes-aviaciya ushın 2 terminal, perron hám angarlar qurılmaqta. Aeroport qolaysız hawa-rayı sharayatlarında da ushıw-qonıwdı támiyinleytuǵın ICAO III-A kategoriyasındaǵı aldınǵı radiotexnika hám meteorologiya úskeneleri menen úskenelenedi. Jabıq angarlarda samolyotlar saz hám qáwipsiz saqlanıwı ushın zamanagóy sharayatlar támiyinlenedi.
Bul aeroport qolaylı jaylasıwı sebepli paytaxt hám Jańa Tashkent qalası ushın áhmiyetli transport xabına aylanadı, sonday-aq, Tashkent wálayatında turizmdi rawajlandırıw ushın qosımsha xoshamet bolıp xızmet etedi. Eń áhmiyetlisi, xalıqaralıq saparlar hám isbilermenlik saparların ámelge asırıw imkaniyatları keńeyedi, sırt el investorların qabıl etiw ushın sharayatlar jaqsılanadı. Nátiyjede ekonomikalıq belsendilik artadı, xızmet kórsetiw tarawı rawajlanadı, jańa jumıs orınları jaratıladı, mámleketimizdiń investiciyalıq tartımlılıǵı sezilerli dárejede artadı.
Mámleketimiz basshısı joybardıń texnikalıq ózgeshelikleri, terminallardıń arxitekturalıq sheshimi menen tanısıp, qurılıs jumısların jedellestiriw, servis dárejesin arttırıw boyınsha anıq tapsırmalar berdi.
Prezident Shavkat Mirziyoevtiń Parkent rayonına saparınıń dáslepki mánzili “Parkentsay” turaq jay massivi boldı.
Aymaqlardı “ósiw noqatları”na tayanıp rawajlandırıw, xalıqqa múnásip turmıs sharayatların jaratıw – mámleketimiz siyasatınıń tiykarǵı baǵdarı. Bunday ózgerisler Parkent rayonında da kózge taslanbaqta.
Rayon orayınan aǵıp ótetuǵın Parkentsay jaǵasında qurılıp atırǵan bul massivti ekoqala dep aytıw múmkin. Onıń ulıwma maydanı altı gektar bolıp, jámi 5 mıń 200 kvartiralı 125 kóp qabatlı turaq jay qurıladı. Olar barlıq zamanagóy kommunallıq tarmaqlar, energiyanı únemleytuǵın texnologiyalar menen támiyinlenedi. Sonıń ishinde, jaylardıń tóbesine geokollektorlar ornatılıp, suw ısıtıwda paydalanıladı.
Xalqı salıstırmalı tıǵız jasaytuǵın aymaqlar ushın bunday massivler áhmiyetli sociallıq áhmiyetke iye. Turaq jaylardıń ıqshamlıǵı hám ózine túser bahası xalqımızǵa say. Bul ayırım máhállelerde bir háwlide qısılıp jasap atırǵan shańaraqlar ushın áyne maqsetke muwapıq boladı.
Mámleketimiz basshısı bul jańa turaq jaylardaǵı sharayatlardı kirip kórdi.
Sonday-aq, bul jerde eki mektep, segiz baqsha, balalar maydanshaları, 10 gektarlıq park, jasalma kól, seyil etiw ornı hám velosiped jolları qurıladı. 17 kilometr ishki jollar ońlanadı.
Massiv tek ǵana abat turmıs ushın emes, al isbilermenlik ushın da sharayat jaratadı. Bul jerde 58 turaq jay emes imarat boy tikleydi. Olarda sawda hám xızmet kórsetiw kárxanaları jaylasıp, 700 den aslam jumıs ornı jaratılıwı názerde tutılǵan.
Mámleketimiz basshısı bul jerde rayondı bunnan bılay da rawajlandırıw ilajları boyınsha prezentaciya menen tanıstı.
Bul baǵdardaǵı áhmiyetli joybar – “Baytqorǵan – Parkent” elektrlestirilgen temir jolı. Házirgi waqıtta onıń qurılısı jedel ketpekte. Derlik 24 kilometrlik bul jol paydalanıwǵa tapsırılǵannan soń, Parkentten paytaxtımızǵa barıw ushın úlken qolaylıq jaratıladı, rayonnıń sulıw kórinislerine sayaxat etiw ańsatlasadı. Onda kúnine 275 mıńǵa shekem jolawshı tasılıwı esaplap shıǵılǵan. Ulıwma, bunıń nátiyjesinde qatnaw hám isbilermenlik jedellesip, Parkent ekonomikasınıń páti jedel artadı.
Parkentsaydı tártipke keltiriw, jaǵalıqların bekkemlew boyınsha da jumıslar alıp barılmaqta. Birinshi basqıshta saydıń 4 kilometr bólegi tolıq betonlastırıldı. Bul jańa qurılıslarǵa jol ashtı. Atap aytqanda, say boylap derlik bes kilometrlik jańa jol qurıldı. Ol házir rayon orayınan ótken tiykarǵı kóshege tutas bolıp, bir sutkada 10 mıń avtomobildi ótkeriw quwatlılıǵına iye. Bul transportlardıń júklemesiniń bir bólegin ózine alıp, orayda tıǵılıstı azaytadı. Sonday-aq, piyadalar jolı, jol ótkeli hám kópir qurılǵan.
Endi, ekinshi basqıshta Kumushkonǵa shekemgi ańǵarlar tártipke keltirilip, ashılatuǵın 100 gektar jerde turizm obektlerin shólkemlestiriw rejelestirilgen.
Prezidentimiz bul jerde parkentli belsendiler menen sáwbetlesti.
-Biziń eń úlken baylıǵımız elimiz tınıshlıǵı, xalqımızdıń tınıshlıǵı. Tınıshlıq turaqlı bolsa, mine usınday qurılıs boladı, rejeler ámelge asadı. Mámleketlik shólkemlerdi mobilizaciyalap, imkaniyatlardı júzege shıǵarıp, barlıq aymaqlardı rawajlandırıwǵa háreket etip atırmız. Parkentke de ǵárezsizlik samalı reformalar nátiyjesi jetip kelgenin kórip quwandım. Xalqımız mine, usınday abadan sharayatta jasawǵa múnásip, -dedi Shavkat Mirziyoev.
Nuraniylar rayonnıń rawajlanıwı ushın jaratılıp atırǵan úlken imkaniyatlar, xalıq turmısında bolıp atırǵan ózgerisler, miynetinen baxıt tawıp atırǵan insanlar haqqında sóz etti.
Mámleketimiz basshısı Parkent rayonındaǵı Kumushkon máhállesinde bolıp, turistlik potencialı hám miyman úylerin kózden ótkerdi.
Bul tarawǵa kóplegen jeńillikler berilip, baslamalar qollap-quwatlanbaqta. Turizm awıllarında kerekli infrastrukturalar shólkemlestirilmekte. Bul imkaniyatlardan paydalanıp, shańaraǵında miyman úylerin ashqanlar bir talay.
Sońǵı jılları Kumushkonǵa sayatxatshılardıń keliwi kóbeygen. Búgingi kúnde seksennen aslam shańaraqta miymanxana shólkemlestirilgen. Olarda jılına 172 mıń sayaxatshıǵa xızmet kórsetilmekte.
Usınday isbilermenlerden biri Olim Yusupov say boyındaǵı háwlisinde 48 orınlıq miyman úyin ashqan. Xanaları milliy usılda, ıqsham etip úskenelengen. Miyman úyi jılına 2 mıńnan zıyat sayaxatshıǵa xızmet kórsetedi.
Prezidentimiz bul jerdegi abatlıq hám isbilermenlikti kórip, bunday joybarlardı basqa da sulıw orınlarda shólkemlestiriw kerek ekenligin atap ótti. Isbilermenlerge zárúr qarjı ajıratıp, qosımsha xızmetler shólkemlestiriwine járdemlesiw boyınsha juwapkerlerge kórsetpe berdi. Máhállelerde ishki imkaniyatlardı júzege shıǵarıw xalıqtı bánt etiwde úlken dárek ekeni atap ótildi.
Bul jerlerge sayatxatshılar sulıw kórinislerden zawıqlanıw ushın keledi. Sonday-aq, Meshit zıyarat etiw ornı da dıqqatqa ılayıq orınlardan biri.
Tashkent wálayatında mıńǵa shamalas usınday miyman úyleri bar. Olarda 2 mıń 500 jumıs ornı jaratılǵan.
Prezidentimiz Parkent rayonındaǵı intensiv baǵda taza miywelerdiń ónimin kózden ótkerdi.
“Meridian Tempo” kárxanasına qaraslı bul 54 gektar baǵda chereshnya, alma, almurt hám malinanıń eksportqa qolaylı sortları egilgen. Náller Franciya hám Ispaniyadan alıp kelingen. Terekler ózin-ózi shańlandırıw qásiyetine iye. Bul ónimdarlıq joqarı bolıwında áhmiyetli orın iyeleydi.
Zamanagóy agrotexnologiyalıq sistemalar arqalı baǵda tolıq tamshılatıp, suwǵarıw engizilgen. Dáslep suw arnawlı háwizde toplanadı. Hám tábiyǵıy qıyalıq arqalı suwǵarıladı.Oǵan energiya jumsalmaydı, nátiyjede qárejet hám ónimniń ózine túser bahası azayadı. Sonday-aq, baǵda quyash panelleri ornatılǵan.
Pisip jetilgen miyweler eksportqa baǵdarlanbaqta. Bıyıl 256 tonna chereshnya, 500 tonna alma, 480 tonna almurt, 30 tonna malina jetistiriw mólsherlengen. Eń áhmiyetlisi, bunnan keletuǵın dáramat basqa dástúriy ósimliklerge salıstırǵanda bir neshe esege joqarı.
Prezidentimiz juwapkerlerge bul usıldı ǵalaba en jaydırıw, miywelerdi tárbiyalaw hám qadaqlaw boyınsha sırt el tájiriybesin engiziw boyınsha kórsetpeler berdi.
Mámleketimiz basshısı Parkent rayonına saparı dawamında “Altın bel” shıńındaǵı dem alıw ornı hám jańa joybarlar menen tanıstı.
Sulıw taw aldındaǵı 3 gektar jerde qurılǵan bul miymanxanalar ıqshamlıǵı hám qolaylılıǵı menen ajıralıp turadı. Házirgi waqıtta jámi 188 orınǵa iye 2 miymanxana, kapsula túrindegi jaylar, restoran hám xojalıq imaratları qurılǵan. Keyingi basqıshta jáne 20 usınday turaq jaydıń qurılısı mólsherlengen.
Shavkat Mirziyoev miymanxanada jaratılǵan sharayatlar menen tanıstı.
Ulıwma etip aytqanda, aymaqta turizmdi rawajlandırıw maqsetinde bahası 1 milliard 800 million dollar bolǵan 52 joybar ámelge asırıladı. Nátiyjede 3 mıń 300 jumıs ornı jaratıladı hám 1 million turistke xızmet kórsetiledi.
Parkenttiń qarlı tawları jáne bir úlken joybardı ámelge asırıw imkaniyatın bermekte. Bul jerde Avstriya kompaniyası tárepinen 1 mıń 200 gektarda taw-lıja kurortın qurıw rejelestirilgen.
Mámleketimiz basshısına bul joybar haqqında málimleme berildi. Onıń sheńberinde 3,4 hám 5 juldızlı miymanxanalar, lıjada ushıw hám aspa jol, shalelar, piknik maydanı, restoranlar, salamatlandırıw xızmetleri shólkemlestiriledi.
Joybar úsh basqıshta ámelge asırıladı hám tolıq quwatlılıqta kúnine 15 mıń turistti qabıl etiw imkaniyatına iye boladı. 600 ge shamalas servis kompleksleri shólkemlestiriledi. Máwsimlik xızmetler menen birge 10 mıńǵa shamalas jumıs ornı jaratıladı. Ulıwma, bul jer Bostanlıqtaǵı “Amirsay” kurortı sıyaqlı, Tashkent wálayatınıń iri turistlik mánzillerinen birine aylanadı.
Qánigeler menen sóylesiwde joybardı jetilistiriw, xızmetler menen qamtıp alıwdı keńeytiw hám qurılıstı tezlestiriw ilajları boyınsha pikir alıstı.
Prezident Shavkat Mirziyoev Parkent rayonındaǵı “Batu Eksport” kárxanasın barıp kórdi.
15 million dollarlıq investiciya esabınan shólkemlestirilgen bul zamanagóy joybar sheńberinde jılına 5 mıń tonna miywe-ovoщ qayta islenedi. Tashkent wálayatınan tısqarı Samarqand hám Ferǵanadan da ónimler alıp kelinedi.
Kárxanaǵa Yaponiya, Germaniya, Belgiya, Qıtayda islep shıǵarılǵan zamanagóy úskeneler ornatılǵan. Bul ónimniń sapası hám básekige shıdamlılıǵın támiyinlewde úlken áhmiyetke iye bolmaqta. Kárxanada 180 turaqlı jumıs ornı jaratılǵan, olar ortasha 7 million sumǵa shekem aylıq miynet haqı alıp atır.
Bul jerde tayarlanǵan ónimler Qıtay, Qubla Koreya, Yaponiya, Birlesken Arab Ámirlikleri, Evropa hám ǴMDA mámleketlerine eksport etiledi.
Mámleketimiz basshısı kárxanadaǵı jumıs procesin kózden ótkerip, xızmetkerler menen sáwbetlesti.

– Miywe-ovoщ jetistiriwde Parkenttiń imkaniyatları úlken. Texnologiya alıp kelip, jáhán bazarına taza hám keptirilgen miywelerdi eksport etiw potencialımız bar. Bir ǵana Yaponiyanı alatuǵın bolsaq, Ózbekstan ónimlerine qızıǵıwshılıq joqarı. Tek ǵana miywelerdi jaqsı tárbiyalap, sapalı jetkerip beriw zárúr. Bunday kárxanalardı rawajlandırsaq, usı tarmaqtıń ózinen bir neshe milliard dollar dáramat alıw múmkin, – dedi Prezident.
Bul jerde Tashkent wálayatınıń eksportqa qolaylı awıl xojalıǵı ónimleri kózden ótkerildi. Ótken jılı wálayattan 130 million dollarlıq miywe-ovoщ ónimleri eksport etilgen. Biraq aymaq tábiyatı hám potencialına salıstırǵanda bul az.

Tarawda eksport etiwshi kárxanalardı qollap-quwatlaw maqsetinde 7 túrdegi qarjılay járdem hám 3 túrli salıq jeńillikleri hám preferenciyalar engizilgen. Tashkent wálayatında miywe-ovoщtı qayta islewshi 175 kárxana bolıp, qayta islew dárejesi jıl sayın artpaqta. Usı jılı eksport kórsetkishin jedel arttırıw rejelestrilgen.

ÓzA