Búgingi kúnde ayırım jol sızıqlarınıń kórinbeytuǵınlıǵı, geyde bolsa joldaǵı tosqınlıqlar sebepli sızıqtı basıwǵa májbúr bolıp atırǵanı, ayırım jaǵdaylarda qaǵıydabuzarlıqlar haqqında bir qansha múddet ótkeninen soń huqıqbuzarǵa xabar beriliwi sıyaqlı jaǵdaylar kóplegen narazılıqlarǵa sebep bolmaqta. Deputatlardıń saylawshılar menen ushırasıwlarında usı sıyaqlı ayırım áhmiyeti kem hákimshilik qaǵıydabuzarlıqlar ushın eskertiw beriw boyınsha usınıslar berilgen.

Bul baǵdarda ayırım sırt mámleketlerde de hákimshilik huqıqbuzarlıqlar islegeni ushın járiyma jazalarınan tısqarı “awız-eki eskertiw” hám “eskertiw” jazası bar. Onda birinshi márte áhmiyeti kem hákimshilik huqıqbuzarlıq islegen puqaralardı járiymaǵa tartıwdıń ornına islegen qılmısınıń sociallıq aqıbetlerin túsindirgen halda eskertiw ámeliyatta bunday qılmıslardıń júz beriwiniń aldın alıwda joqarı nátiyjelerge erisilip atırǵanın kórsetpekte.
Endigiden bılay, Ózbekstan Respublikasınıń Hákimshilik juwapkershilik haqqındaǵı kodeksine «hákimshilik eskertiw» jaza ilajın kirgiziw hám sociallıq qáwipsizligi az bolǵan jol háreketi qáwipsizligi menen baylanıslı huqıqbuzarlıqlar ushın eskertiw jazasın qollanıwdı názerde tutıwshı ózgeris hám qosımshalar kirgizilmekte.
Atap aytqanda, transport quralın basqarıw procesinde belbew taqpaw, texnikalıq tekseriwden ótkermegenligi, tiyisli úskeneler menen támiyinlenbegenligi, basqarıw waqtında telefonnan paydalanıw, monitordan paydalanıw, toqtaw hám toqtap turıw qaǵıydaların buzıw, májbúriy qamsızlandırıw talapların buzıw, piyadalar hám basqa da jol háreketi qatnasıwshılarınıń jol háreketi qaǵıydalarına ámel etpewi sıyaqlı jaǵdaylar ushın eskertiw qollanıladı. Bunday eskertiw bir jılda bir márte qollanıladı.
Sonday-aq, kamera hám radarlar arqalı jazılǵan huqıqbuzarlıqlar boyınsha qarar bir aydan keshiktirip shıǵarılǵan bolsa, járiyma qollanılmaydı. Jol sızıqların basqanı kamera arqalı jazılmaydı.
Usı tártiplerdi óz ishine alǵan “Ózbekstan Respublikasınıń Hákimshilik juwapkershilik haqqındaǵı kodeksine ózgerisler hám qosımshalar kirgiziw haqqında”ǵı nızam joybarı parlamenttiń tómengi palatasınıń májilisinde qızǵın dodalandı. Bir qatar sorawlar ortaǵa taslandı.
Nızam joybarı avtomobillerden paydalanıwda xalıqqa qosımsha qolaylıqlar jaratıw, tarawda puqaralardı qıynap kiyatırǵan ayırım mashqalalardı saplastırıwǵa xızmet etetuǵını ayrıqsha atap ótildi.
Nızam joybarı deputatlar tárepinen qabıl etildi.

ÓzA