17-iyun kúni Ózbekstan Respublikası Prezidenti Shavkat Mirziyoev hám Qıtay Xalıq Respublikası Baslıǵı Si Czinpinniń sóylesiwleri bolıp ótti.

Eki tárepleme hám regionallıq áhmiyetke iye aktual máseleler kórip shıǵıldı.
Mámleket basshıları keyingi jılları Ózbekstan menen Qıtay arasındaǵı doslıq hám barlıq sharayatlarda hár tárepleme strategiyalıq sheriklik qatnasıqları misli kórilmegen joqarı dárejege kóterilgenin úlken qanaatlanıwshılıq penen atap ótti.
Ózbekstan Prezidentiniń 2024-jıl yanvar ayında Qıtayǵa mámleketlik saparı dawamında erisilgen kelisimler izbe-iz ámelge asırılmaqta.
Barlıq dárejelerde baylanıslar hám almasıwlar sezilerli jedelleskeni atap ótildi.
Sırtqı isler ministrleriniń strategiyalıq sóylesiwi jolǵa qoyıldı. Usı jılı iyun ayınıń basında Samarqand qalasında ekinshi Aymaqlar forumı tabıslı ótkerildi.
Sawda-ekonomikalıq hám qarjı-investiciyalıq birge islesiw jedel rawajlanbaqta. 2024-jılı tovar almasıw 14 milliard dollarǵa jetti. Investiciyalıq joybarlar portfeli 60 milliard dollardan aslamdı quramaqta.
Mámleketimiz aymaqlarında birgeliktegi texnoparkler hám arnawlı industriallıq zonalar tabıslı jumıs alıp barmaqta, “BYD” elektromobillerin islep shıǵarıw keńeymekte.
“Jasıl” energetika, neft-gaz, ximiya, farmacevtika, metallurgiya, taw-kán, toqımashılıq, azıq-awqat hám qurılıs tarmaqlarında sonday-aq, logistika, “aqıllı” awıl xojalıǵı, jasalma intellekt hám sanlastırıw tarawlarında perspektivalı joybarlar islep shıǵılmaqta.
Qıtaydıń jetekshi finans institutları menen óz-ara paydalı birge islesiw jolǵa qoyılǵan. “Jipek jolı” qorı menen investiciyalıq platformanı keńeytiw rejelestirilgen. Qıtay Eksimbanki qatnasıwında paytaxtımızda Olimpiada qalashasınıń qurılısı juwmaqlanbaqta. Tashkent qalasında usı banktiń regionallıq filialı ashıldı.
Kámbaǵallıqqa qarsı gúresiw tarawındaǵı birge islesiwdi bunnan bılay da tereńlestiriw máselelerine ayrıqsha itibar qaratıldı.
Jetekshiler “Qıtay – Qırǵızstan – Ózbekstan” strategiyalıq temir jol qurılısın jedellestiriw zárúr ekenligin de atap ótti.
Bilimlendiriw, ilim, turizm hám mádeniyat, kadrlar tayarlaw hám qıtay tilin úyreniw tarawlarındaǵı almasıwlardı rawajlandırıwdan mápdarlıq bildirildi.
Ózbekstanda Qıtaydıń Arqa-batıs awıl xojalıǵı hám toǵay xojalıǵı universitetiniń filialı jumıs alıp barmaqta, Úrgensh universiteti negizinde Pekin universiteti menen birgelikte Xalıqaralıq matematika orayı shólkemlestirilgen.
Ótken jılı Konfuciy institutı jumısınıń 20 jıllıǵı belgilendi, Qıtaydıń “Lu Ban ustaxanası” professional bilimlendiriw sisteması engizilmekte.
Kelesi jılı eki mámlekette mádeniyat hám kórkem óner hápteliklerin ótkeriw rejelestirilgen.
Ushırasıwda xalıqaralıq kún tártibi boyınsha da pikir alısıldı. BMSh, ShBSh, “Oraylıq Aziya – Qıtay” formatı hám basqa da kóp tárepleme strukturalar sheńberindegi muwapıqlasıw hám óz-ara qollap-quwatlawdı dawam ettiriw áhmiyetli ekenligi atap ótildi.
Juwmaǵında jetekshilerdiń qatnasıwında Ózbekstannıń JSShǵa aǵza bolıwı boyınsha eki tárepleme sóylesiwler juwmaqlanǵanı haqqında protokolǵa qol qoyılǵanı járiyalandı.

ÓzA