Prezident Shavkat Mirziyoev 16-iyun kúni Tashkent qalasında rejelestirilgen qurılıs hám jámiyetlik transport joybarları prezentaciyası menen tanıstı.

Sońǵı jıllarda izbe-iz artıp atırǵan investiciyalıq tartımlılıq sebepli paytaxtımızda qurılıs páti jedellespekte. Kóp qabatlı turaq jaylar, miymanxanalar, biznes orayları, mádeniyat hám sport kompleksleri qala imkaniyatların keńeytpekte. Jańa Tashkent qurılısı da baslanıp, ekewi zamanagóy megapoliske aylanbaqta.
Uzaq jıllar xızmet etetuǵın bunday jumıslarda, álbette, sapa oǵada áhmiyetli, 13-may kún usı másele boyınsha májilis ótkerilgen edi. Mámleketimiz basshısı qurılısta sapa hám qáwipsizlik birinshi orında ekenin atap ótip, bul baǵdarlardı ilimiy rawajlandırıw, tarawǵa zamanagóy processlerdi engiziw boyınsha kórsetpeler bergen edi.
Búgingi prezentaciyada usı baǵdarda orınlanǵan jumıslar haqqında málimleme berildi. Tapsırmaǵa bola, jańa joybarlastırılǵan kóp qabatlı imaratlardıń qáwipsizlik talaplarına sáykes ekenligi qayta úyrenip shıǵılǵan. «ÓzGAShKLITI», Ilimler akademiyası Seysmologiya institutı, ayrıqsha jaǵdaylar basqarması, sanitariya-epidemiologiya sıyaqlı 10ǵa shamalas shólkemniń ilimiy-texnikalıq juwmaqları alınǵan. Jańa talapqa bola, kóp qabatlı imaratlardıń jer silkiniwge shıdamlılıǵı 9 balldan kem bolmaydı. Hár bir usınday joybar boyınsha toplanǵan juwmaqlar shıǵarıladı.
Biyik obektler, jańa kompleksler kóbeygen sayın olarǵa turaqlı elektr energiyası da zárúr. Sonlıqtan CHilanzar rayonında 160 megavattlı jańa podstanciya qurılısı rejelestirilgen. Bul arqalı usı aymaqtaǵı bolajaq joybarlar ushın qosımsha quwatlılıq payda boladı, házirgi tarmaqlarǵa júkleme túspeydi.
Sonday-aq bul rayonda 20 mıń metr kub sıyımǵa iye suw rezervuarı qurılısı mólsherlengen. Nátiyjede Shayxantaxur, CHilanzar hám Úchtepa rayonlarında ishimlik suwı támiynatı úzliksizligi támiyinlenedi. Kúnine derlik 8 mıń kilovatt saat elektr únemlenedi.
Tashkent qalası kóplegen isbilermenlik ilajlardı, forum hám kórgizbelerdi ótkermekte. Usınday orınlardan biri Central Asian Expo Uzbekistan – CAEx kompleksi. Xalıqaralıq ánjumanlar sheńberinde túrli ushırasıwlar da ótkeriliwin inabatqa alıp, bul jerde sóylesiw zallarınıń qurılısı názerde tutılǵan.
Qala tartımlıǵınıń jáne bir áhmiyetli faktorı – qolaylı jámiyetlik transport. Payiaxtımızda hám avtobus, hám metropoliten baǵdarları izbe- iz keńeytilip barılmaqta.
Aldın xabar berilgendey, metropolitendi Tashkent traktor zavodı kvartalına shekem alıp barıw rejelestirilgen. Onı 2 basqıshta ámelge asırıw názerde tutılmaqta. Birinshi basqıshta CHilanzar jolınıń Pushkin bándirgisinen Tashkent aylanba jolına shekem jer betinde metro jolı qurıladı. Ekinshi basqıshta ol jerden Tashkent traktor zavodı kvartalınıń úlken bándirgisine shekem jer astı jolı qurıladı.
Sonday-aq, transportlardıń háreketine kolaylılıq jaratıw maqsetinde usı temir joldı Tashkent aylanba jolı astınan ótkeriw názerde tutılmaqta. Jer astı baǵdarı da kóshedegi háreketti toqtatpaǵan halda qurıladı. Bul jańa metro jolı 85 mıń jolawshını qamtıp alıwı kútilmekte.
Bul tarawdaǵı jáne bir perspektivalı joybar – Jańa Tashkent qalasına metro jolı esaplanadı. Ol házirgi «Doslıq» metro bándirgisinen baslanıp, jańa orayǵa shekem boladı. Uzınlıǵı 21 kilometr, 9 bándirgiden ibarat bolıwı kútilip atırǵan bul metro kúnine 230 mıńǵa shekem jolawshılardı qamtıp ala aladı.
Prezentaciyada usı joybarlardıń texnikalıq-ekonomikalıq tárepleri kórip shıǵıldı. Mámleketimiz basshısı qurılıstıń sapasın hám mádeniyatın arttırıw, adamlarǵa qolaylı sharayatlar jaratıw boyınsha kórsetpeler berdi.

ÓzA