Húrmetli májilis qatnasıwshıları!

Húrmetli Odil Reno-Basso xanım!

Sırt el investorları keńesiniń gezektegi májilisinde sizler menen ushırasıp turǵanımnan oǵada quwanıshlıman.
Biz keshe Xalıqaralıq investiciyalıq forumda ekonomikamızdı bunnan bılay da rawajlandırıw máselelerin, strategiyalıq áhmiyetke iye bolǵan baǵdarlardı hár tárepleme dodaladıq.
Búgin bolsa sizler menen tájiriybe almasıw, anıq joybarlarıńızdı ámelge asırıw, jańa baslama hám usınıslar boyınsha jaqınnan másláhátlesemiz.
Bunday formattaǵı doslıq sóylesiwlerimiz óziniń ámeliy nátiyjeliligi, jańa joybarlardı ámelge asırıwǵa qosıp atırǵan sheksiz úlesi menen ayrıqsha ajıralıp turadı.
Aldınǵı ushırasıwlarımız óz nátiyjesin bere basladı. Usı jerde ayırım mısallardı keltirip ótpekshimen.
Xalıqaralıq qarjı shólkemleri menen pútkilley jańasha jumıs islewge ótip, anıq nátiyjege qaratılǵan tabıslı birge islesiw sistemasın engizdik. Atap aytqanda, Evropa tikleniw hám rawajlanıw banki ótken jılı Ózbekstanǵa rekord muǵdarda – 1 milliard dollarǵa shamalas investiciya kirgizdi. Mámleketimiz usı banktiń regiondaǵı eń iri sherigine aylandı.
Bunday jetiskenliklerimizde Reno-Basso xanımnıń úlken úlesi bar ekenin, álbette, jaqsı bilemiz hám joqarı qádirleymiz. Jáne bir márte sizge óz minnetdarshılıǵımdı bildiremen.
Sonday-aq, xalıqaralıq qarjı shólkemleriniń jeke-menshik sektor menen birge islesiwi keskin kúsheyip, olar bir qatar aldıńǵı kárxanalarǵa tikkeley investiciyalar kirgizdi. Sonıń ishinde, bir jıl dawamında olardıń jeke menshik kompaniya hám bankler menen birgeliktegi joybarlarınıń kólemi 1 milliard dollardan arttı.
Jáne bir baǵdar. Búgin bul ushırasıwda qatnasıp atırǵan kompaniyalar “jasıl” energetika, shıǵındılardı qayta islew, elektr energiyasın saqlaw, “jasıl” vodorod islep shıǵarıw sıyaqlı aldınǵı tarawlarda jańa joybarlardı baslaǵanın ayrıqsha atap ótpekshimen.
Bul baǵdarda “Acwa Power”, “Masdar”, “Linde”, “Shanghai Environment”, “Total Energies” sıyaqlı jetekshi kompaniyalar 8 milliard dollardan aslam investiciya kirgizip, “jasıl” ekonomikanı rawajlandırıwǵa úlken úles qospaqta.
Sanlı texnologiyalar tarawında da dúnya tán alǵan abıraylı kompaniyalar elimizge jedel kirip kelmekte. Ásirese, “DataVolt” kompaniyası regiondaǵı eń iri “jasıl data orayı,” “Veon” kompaniyası jasalma intellektke tiykarlanǵan “mobil super-qosımsha” jaratıw boyınsha joybarlardı baslaǵanı bizdi oǵada quwandıradı.
Álbette, bunday joybarlar keleshektiń bekkem tiykarı bolıp xızmet etedi.
Bunday mısallardı kóplep keltiriwimiz múmkin.
Bunı sırt el investorlarınıń reformalarımızǵa bolǵan joqarı isenimi, ashıq-aydınlıq siyasatımızdıń ayqın mısalı, dep bilemen.
Keńesimiz aǵzaları bolǵan Xalıqaralıq qarjı korporaciyası, “Ernst & Young”, “Dentons”, “Knauf”, “TBC” sıyaqlı kompaniyalar milliy nızamshılıqtı xalıqaralıq standartlar tiykarında jáne de jetilistiriw boyınsha bir qatar usınıslar berdi. Sizlerdiń jańa baslama hám ideyalarıńız 10 nan aslam nızam, párman hám qararlarımızda óz kórinisin taptı.
Ulıwma alǵanda, elimizde jumıs islep atırǵan investorlardıń belsendiligi artıp, sońǵı eki jılda sırt el kapitalınıń qatnasıwında 5,5 mıń jańa kárxana shólkemlestirildi. Olardıń ulıwma sanı 16 mıńǵa jetti.
Húrmetli doslar!
Biz búgingi ushırasıwǵa pútkilley basqasha tayarlıq kórdik. Sırt el kárxanaları menen birme-bir sóylesip, bildirilgen 40 tan aslam baslamalardı saylap aldıq. Sonıń ishinde, investorlar salıq nızamshılıǵınıń turaqlılıǵın támiyinlew, tikkeley ámel etetuǵın nızamlardı kóbeytiw, infrastruktura tarawlarında jeke menshik sektordıń úlesin arttırıw boyınsha usınıslar berdi.
Biz olardıń barlıǵın álbette esapqa alamız hám Keńes aǵzaları menen hár bir usınıs ústinde qatań islep atırmız. Máselen, 2028-jılǵa shekem biznes ushın tiykarǵı salıq stavkaları ózgermeytuǵının járiyaladıq. Usı jılı jol, transport, energetika, suw, irrigaciya tarawlarında derlik 4,5 milliard dollarlıq mámleketlik-jeke menshik sheriklik joybarların basladıq. Xalıqaralıq qarjı esabatlar standartlarına ótiw hám ekologiyalıq, sociallıq hám korporativ basqarıwdı engiziw boyınsha normativlik huqıqıy hújjetler islep shıǵılmaqta.
Kóp múrájatlar elektr tarmaqlarına jalǵanıw boyınsha kelip tústi. Onda, álbette, eń aldınǵı sırt el tájiriybesinen paydalanıwımız shárt. Sonıń ushın bul baǵdarda Keńesimiz janında óz aldına jumısshı topar dúzip, anıq mexanizmlerdi islep shıǵıwdı usınıs etemen.
Túsken usınıslardan kelip shıǵıp, girew haqqındaǵı nızamshılıqtı jetilistiriw, sırt el kompaniyaları ushın professional kadrlardı tayarlaw, jergilikli kompaniyalarda korporativ basqarıwdı jaqsılaw, salıq hákimshiligi boyınsha qosımsha jumısshı toparlar shólkemlestiriledi.
Ótken májilisimizde kún tártibindegi eń áhmiyetli baǵdarlar – sanlastırıw, juwapkershilikli biznes júrgiziw hám alternativ investiciya boyınsha jumısshı toparlar dúzip alǵan edik. Búgin olardıń prezentaciyaları menen tanısamız.
Jáne bir áhmiyetli másele. Sońǵı bir jılda Keńesimizdiń jumısı keskin jedellesti. Sonıń menen birge, Keńes sekretariatı tek ǵana investiciya ministrligi menen emes, al basqa da ministrlikler hám uyımlar, xalıqaralıq shólkem hám investorlar menen de tikkeley islespekte. Sonıń ushın Sekretariattıń erkinligin arttırıp, onı óz aldına yuridikalıq shaxs sıpatında qayta shólkemlestirsek, maqsetke muwapıq bolar edi.
Bul másele boyınsha da sizlerdiń pikirlerińizdi bilmekshi edim.
Áziz doslar!
Búgin bolıp ótken nátiyjeli sóylesiwlerimizden oǵada quwanıshlıman. Ashıǵın aytqanda, sizlerden mine, usınday qızǵın hám ámeliy pikirlerdi kútken edim.
Hár bir pikir-usınıslar tolıq úyrenip shıǵıladı. Húkimetimiz tárepinen óz aldına “jol kartası” qabıl etiledi.
Jáne bir márte atap ótpekshimen: biz investorlar ushın ashıq, erkin, turaqlı hám isenimli mámleket – Jańa Ózbekstandı qurıp atırmız.
Bul jolda baslaǵan hám artqa qaytpaytuǵın túrge engen reformalarımızdı bunnan bılay da izbe-iz dawam ettiremiz.
Sizlerdi elimizge tek ǵana investiciya kirgiziwge emes, al tabısımız tariyxınıń haqıyqıy qatnasıwshılarına, biz jaratıp atırǵan ullı keleshektiń ajıralmas bólegine aylanıwǵa shaqıramız.
Birgeliktegi umtılıs hám háreketlerimiz arqalı hár bir joybar nátiyjeli birge islesiwimizdiń ayqın úlgisine aylanatuǵınına isenemiz.
Hámmeńizge bul iygilikli jolda úlken jetiskenlik hám jańa áwmetler tileymen.

ÓzA