Ózbekstan Respublikası Prezidenti Shavkat Mirziyoev 11-iyun kúni Sırt el investorları keńesiniń úshinshi májilisi aldınan Evropa tikleniw hám rawajlanıw bankiniń prezidenti Odil Reno-Basso basshılıǵındaǵı delegaciyanı qabılladı.

Ózbekstan menen bul abıraylı xalıqaralıq finanslıq institut arasındaǵı strategiyalıq birge islesiwdi bunnan bılay da keńeytiw máseleleri kórip shıǵıldı.
Birgeliktegi joybarlar portfeli keńeyip atırǵanı qanaatlanıwshılıq penen atap ótildi: ETRBnıń Ózbekstanǵa investiciyaları 5,5 milliard evrodan astı. Usı jılı jáne 1,1 milliard evro tartıw rejelestirilgen bolıp, onıń úlken bólegi jeke menshik sektordı qollap-quwatlawǵa baǵdarlanadı.
Sheriklik strategiyası nátiyjeli ámelge asırılmaqta. ETRBnıń jedel járdemi menen bank tarawı transformaciyalanbaqta.
Mámleketimiz basshısı birge islesiw nátiyjeliligin arttırıw áhmiyetli ekenin atap ótip, onıń tiykarǵı baǵdarların kórsetip ótti.
Suw támiynatı sistemasın texnologiyalıq jaqtan modernizaciyalaw, energiya nátiyjeliligin arttırıw baǵdarlamasın alǵa qoyıw, ipoteka bazarın, erkin ekonomikalıq zonalar infrastrukturasın rawajlandırıw, kishi hám orta biznes imkaniyatların keńeytiw, hayal-qızlar isbilermenligin qollap-quwatlaw sıyaqlı baǵdarlar usılardıń qatarına kiredi.
Bilimlendiriw hám medicina tarawlarında mámleketlik-jeke menshik sheriklik joybarların alǵa qoyıw, jasalma intellektti engiziw hám sanlı transformaciyaǵa qaratılǵan startaplardı qollap-quwatlawǵa ayrıqsha itibar qaratıldı.
Sırt el investorları keńesiniń bolajaq úshinshi májilisiniń kún tártibi boyınsha da pikir alısıldı.

ÓzA