Oliy Majlis Senatınıń Baslıǵı Tanzila Norboeva IV Tashkent xalıqaralıq investiciyalıq forumında qatnasıw ushın elimizge rásmiy sapar menen kelgen Bolgariya Respublikası Prezidenti Rumen Radev penen ushırastı.

Parlamenttiń joqarı palatasınıń basshısı joqarı mártebeli miymandı qızǵın qutlıqlap, Bolgariya Prezidentiniń saparı eki táreptiń óz-ara paydalı sheriklikti bekkemlew hám tereńlestiriwge umtılısın tastıyıqlaytuǵının atap ótti.
Ózbekstan-Bolgariya qatnasıqları 28 eki tárepleme hújjetti óz ishine alǵan bekkem shártnamalıq-huqıqıy tiykarda izbe-iz rawajlanıp atırǵanı atap ótildi.
Bolgariya Prezidenti Rumen Radev mámleketimizde bolıp ótip atırǵan Tashkent xalıqaralıq investiciya forumı Oraylıq Aziya mámleketleriniń ekonomikalıq rawajlanıwı hám xalıqaralıq investiciyalıq birge islesiw ushın áhmiyetli platforma ekenin atap ótti.
Sóylesiw dawamında parlamentleraralıq qatnasıqlardı jedellestiriw máselelerine ayrıqsha itibar qaratıldı. Bul baǵdarda parlamentleraralıq sóylesiwdiń ornı hám áhmiyetine itibar qaratılıp, Bolgariya Prezidentiniń Senatqa saparı parlamentler arasındaǵı birge islesiwdi jedellestiriwge kúshli túrtki bolatuǵını atap ótildi.
Tárepler eki mámleket parlamentleri arasında sistemalı birge islesiwdi jolǵa qoyıw, sonıń ishinde, palatalar hám tiyisli komitetlerdiń basshıları dárejesinde turaqlı ushırasıwlar ótkeriw, parlamentleraralıq doslıq toparlarınıń birgeliktegi rejelerin islep shıǵıw, sonday-aq, nızam dóretiwshiligi tarawında tájiriybe almasıw zárúr ekenligi haqqında birdey pikir bildirdi.

N.Abduraimova,
ÓzA