Xalıqaralıq áskeriy sport keńesi (CISM) milliy sportımız kurashti óz kalendarınan orın alǵan sport túri sıpatında tán aldı. Bul áhmiyetli qarar Shri-Lankanıń Kolombo qalasında bolıp ótken CISM Bas Assambleyasında járiyalandı.

1948-jılı shólkemlestirilgen Xalıqaralıq áskeriy sport keńesiniń bas rezidenciyası Belgiyada jaylasqan bolıp, oǵan 140 mámleket aǵza bolıp esaplanatuǵının aytıp ótiw kerek.
Xalıqaralıq kurash associaciyası (IKA) hám Ózbekstan Qurallı Kúshleri hám Ózbekstan gúres federaciyasınıń izbe-iz háreketleri, sóylesiwleri hám birge islesiwi nátiyjesinde CISM sistemasına kirgizilgen kurash prezentaciyası Xalıqaralıq áskeriy sport keńesi aǵzalarınıń qatnasıwında ótkerildi.
Bul xalıqaralıq sport shólkeminiń qáwenderligindegi birinshi rásmiy jarıs – «Kurash Challenge Cup» turniriniń kelesi jıldıń sentyabr ayında Ózbekstanda ótkeriliwi názerde tutılmaqta.
Áskeriy sportshılar arasında gúres jarıslarınıń jolǵa qoyılǵanı onıń xalıqaralıq rawajlanıwında jańa basqıshtı baslap berip atırǵanı menen itibarlı bolıp esaplanadı.
Bul tek ǵana sportshılar emes, al milliy federaciyalar hám millionlaǵan gúres ıqlasbentleri ushın úlken imkaniyatlar esigin ashıwı menen qádirli.

T.Rwziev, ÓzA