Ózbekstan Respublikası Prezidenti Shavkat Mirziyoev Tashkent xalıqaralıq investiciyalıq forumı aldınan Amerika Qurama Shtatları jetekshi kompaniyalarınıń delegaciyası menen ushırasıw ótkerdi.

Ushırasıwda AQSh Mámleketlik xatkeriniń járdemshisi Erik Meyer, Amerika – Ózbekstan sawda palatasınıń baslıǵı Kerolin Lemm, Xalıqaralıq rawajlanıw qarjı korporaciyasınıń vice-prezidenti Brez Betani, sonday-aq, «Boeing», «FLS», «Visa», «NASDAQ», «Air Products», «Franklin Templeton», «Morgan Stanley», «Coca-Cola» hám basqa da kóplegen korporaciyalardıń basshıları qatnastı..
Mámleketimiz basshısı bul ushırasıw Amerika biznesinde Ózbekstandaǵı jumıstı keńeytiwge qızıǵıwshılıq artıp atırǵanınan dárek ekenin úlken qanaatlanıwshılıq penen atap ótti.
Investiciyalıq hám innovaciyalıq birge islesiw perspektivalarına, strategiyalıq áhmiyetke iye materiallardı ózlestiriw hám qayta islew, jasalma intellekt hám sanlı texnologiyalar, transport hám energetika infrastrukturasın modernizaciyalaw, awıl xojalıǵı, turizm hám basqa da tarawlarda anıq joybarlardı alǵa qoyıwǵa ayrıqsha itibar qaratıldı.
AQShtıń jetekshi kompaniyalarınıń basshıları investorlardıń nátiyjeli jumısına jaratılıp atırǵan qolaylı sharayatlar ushın Ózbekstan Prezidentine minnetdarshılıq bildirip, ózleriniń anıq usınıs hám rejelerin bildirdi.

ÓzA