Yakkasaray rayonında jasawshı eki kishkene qız kanalǵa túsip ketti. Bunı kórgen márt hám batır watanlasımız Abdumannop Samiqov ózin suwǵa taslap, nárestelerdiń ómirin saqlap qaldı. Biraq, tilekke qarsı, baxıtsız hádiyse júz berdi – bul jaqsılıq jolında onıń ózi qaharmanlarsha qaza taptı.

Málim bolıwınsha, bul pidayılıq biykarǵa emes – Abdumannop Samiqov bárqulla adamlarǵa jaqsılıq etetuǵın, el-xalıqqa paydası tiygen watansúygish insan edi.
Mámleketimiz basshısı bul erlik tariyxın júregine jaqın alıp, bárinen burın, marhumnıń ómirlik joldası hám perzentlerine kewil bildirdi. Búgin húrmetli Prezidentimiz marhum Abdumannop Samiqovtı «Jasorat» medalı menen sıylıqlaw haqqındaǵı pármanǵa qol qoydı.
Sonday-aq, qızlardı qutqarıwda pidayılıq kórsetken «Bórijar» sport kompleksiniń jumısshısı Nurmuhammad Mamasaliev te «Jasorat» medalı menen sıylıqlandı.
Bul mámleketimizde insan qádirin ulıǵlaw, watan qaharmanlarına húrmet kórsetiw baǵdarındaǵı itibardıń jáne bir kórinisi boldı. Kúshli hám miyrim-shápáátli jámiyette adamgershilik hesh qashan umıtılmaydı.