Ekonomikalıq izertlewler hám reformalar orayınıń tallawlarına bola, mámleketimizde energiya nátiyjeliligin arttırıwǵa qaratılǵan ilajlar ekonomikalıq rawajlanıwdıń áhmiyetli faktorı bolıp xızmet etpekte.

Mámleketimizde imaratlardıń energiya nátiyjeliligin arttırıw tarawında investiciyalıq potencial qáliplestirilmekte. Esap-sanaqlarǵa bola, mámlekettegi kóp kvartiralı turaq jaydıń sırtqı diywalların izolyaciyalaw, ısıtıw sistemaların, esik hám aynalardı almastırıw nátiyjesinde jılına 60 million dollardan aslam qarjını únemlew múmkin.
Jáhán bankiniń esap-sanaqlarına bola, sociallıq taraw obektleri, sonıń ishinde, densawlıqtı saqlaw mákemeleri, mektepke shekemgi bilimlendiriw mákemeleri hám mámleketlik mekteplerde de sonday potencial bar bolıp, energiya nátiyjeliligin arttırıwǵa qaratılǵan maqsetli investiciyalar kirgiziw arqalı energiya tutınıwın 20-50% ke únemlew imkaniyatın beredi hám tutınıwdı jılına 7,1 mlrd kVt/saatqa shekem qısqartıw múmkin.
Ekonomikalıq paydadan tısqarı, bul ilajlar hár jılı atmosferaǵa shıǵarılatuǵın SO2 kólemin ortasha 780 mıń tonnaǵa qısqartıwǵa járdem beredi. Mámlekette uglerod birlikleri sawdası bazarı bar hám biz artıqsha kvotalardı basqa mámleketlerge tabıslı satıp atırmız. Bul ilajlardı ámelge asırıw sawda kólemin jáne de arttırıwǵa imkaniyat beredi, bul bolsa jılına 50 million dollarǵa shekem dáramat keltiriwi múmkin.
Ámelge asırılıp atırǵan reformalar infrastrukturanı jańalaw, energiya nátiyjeliligin arttırıw hám bazar principleri tiykarında turaqlı hám nátiyjeli energetika sistemasına basqıshpa-basqısh ótiw óziniń dáslepki nátiyjelerin bermekte. Bunday ilajlar tek ǵana ekonomikalıq payda keltirip qoymastan, al ekologiyalıq turaqlılıqtı támiyinlewge de xızmet etedi.
Energiya nátiyjeliligin arttırıwǵa qaratılǵan investiciyalardıń tabısı, imaratlardıń energiya nátiyjeliligin arttırıw boyınsha ámelge asırılatuǵın joybarlarda jergilikli xalıq hám shólkemlerdiń qatnasıwın támiyinlew joybarlardıń nátiyjeliligin arttırıwǵa járdem beredi.
Nátiyjede, energiya nátiyjeliligin arttırıw boyınsha ámelge asırılıp atırǵan ilajlar tek ǵana ekonomikalıq nátiyjelilikti támiyinlep qoymastan, al mámleketimizdiń turaqlı rawajlanıwına da úles qosadı.