BMSh Hayal-qızlar shólkemi hám Biyǵárez tallaw orayı – Progressiv reformalar orayı arasında elimizde gender teńligi hám hayal-qızlardıń huqıqın alǵa qoyıw jolında birge islesiw boyınsha túsinisiw memorandumına qol qoyıldı.

Bul birge islesiw dálillerge tiykarlanǵan siyasiy reformalardı alǵa qoyıw, institutlardıń potencialın bekkemlew hám gender máseleleri boyınsha inklyuziv milliy qarım-qatnastı rawajlandırıwǵa qaratılǵan.
Birge islesiw sheńberinde eki tárep hayal-qızlarǵa qarsı zorlıqtıń aldın alıw, olardıń ekonomikalıq huqıq hám imkaniyatın keńeytiw, ǵalaba xabar qurallarında gender teńlik máselelerin sáwlelendiriwdi kúsheytiw sıyaqlı baǵdarlarda birgeliktegi baslamalardı alǵa qoyadı.
Progressiv reformalar orayı maǵlıwmatlardı sistemalı túrde toplaw hám tereń tallaw, áhmiyetli hám isenimli izertlewler alıp barıwda jetekshi rol atqaratuǵının atap ótiw kerek. Sonıń menen birge, BMSh Hayal-qızlar shólkemi bolsa globallıq aldınǵı tájiriybeler, xalıqaralıq standartlar hám texnikalıq járdemdi usınıs etip, Ózbekstannıń gender tarawındaǵı reformaların xalıqaralıq kontekst penen muwapıqlastırıw hám bekkemlewge járdemlesedi.
– Bul birge islesiw gender teńsizligine qarsı gúresiwde jergilikli sharayatqa tiykarlanǵan, biraq globallıq tájiriybeden xabardar qatnaslarǵa ótiwimizdi ańlatadı, – deydi Progressiv reformalar orayınıń direktorı Mirshohid Aslanov. – Kúshlerimizdi birlestirip, izertlewler, sóylesiw hám ámeliy háreketler arqalı turaqlı nátiyjelerdi jaratıwdı maqset etkenbiz.
Bul memorandum hár eki shólkemniń erkin dawısın húrmet etken halda, birgeliktegi kommunikaciya mexanizmleri hám ulıwma úgit-násiyatlaw strategiyaların belgileydi. Bul birge islesiw mámleketimizde reformalarǵa baǵdarlanǵan birge islesiw ortalıǵınıń keńeyip atırǵanınan áhmiyetli kórsetkishi esaplanadı.

Behruz Xudoyberdiev, ÓzA