Keyingi jılları mámleketimizde veterinariya tarawına tek ǵana agrar sistemanıń tómengi buwını sıpatında emes, al ekonomikanıń drayver baǵdarlarınan biri sıpatında qaralmaqta.

Bunıń tiykarında alıp barılıp atırǵan reformalardıń nátiyjesi sıpatında júzege kelgen jetik ámeliyat sisteması jatır. Taraw tek ǵana epizootikalıq hám epidemiyalıq turaqlılıqtı támiyinleytuǵın emes, al xalıqqa turaqlı xızmet kórsetetuǵın ekonomikalıq tartımlı baǵdar sıpatında kózge taslana basladı.
Haywanlardan adamǵa juǵatuǵın keselliklerdi jılawlawdaǵı jańa qatnaslar, jabayı quslardıń migraciyası sebepli kirip keletuǵın kesellikler qáwpin jumsartıwdaǵı tájiriybeler, sonday-aq, sharwashılıq ónimlerin xalıqtıń dasturxanına qáwipsiz jetkeriw boyınsha jetik sistema jaratılǵanı itibarǵa ılayıq. Bul mámleketimizdiń tarawda ǴMDA mámleketleri arasında jetekshi bolıwın támiyinledi.
Mámleketimizde veterinariya bilimlendiriwin rawajlandırıw, onı bir waqıttıń ózinde ámeliyatqa integraciyalaw, xalıqaralıq standartlardı milliy sistemaǵa engiziw, ásirese, Xalıqaralıq qarjı institutlarınıń jeńilletilgen qarjıları hám perspektivalı grant joybarların tartıwdaǵı tájiriybeler xalıqaralıq ekspertler tárepinen joqarı bahalandı.
Parijde bolıp ótken Dúnya haywanlar salamatlıǵı shólkemi assambleyasınıń 92-sessiyasında mámleketimiz basshısı Shavkat Mirziyoevtiń veterinariya tarawına kórsetip atırǵan itibarı hám jaratılǵan jetik ámeliyat sisteması ayrıqsha atap ótildi. Xalıqaralıq shólkem basshısı Emmanuel Subeyran xanım tárepinen Ózbekstannıń veterinariya tarawındaǵı sisteması hám tájiriybesi dúnya mámleketlerine perspektivalı baǵdar dep usınıs etildi.
Ánjuman dawamında Veterinariya hám sharwashılıqtı rawajlandırıw komitetiniń baslıǵı Bahrom Norqobilovqa “Xızmetleri ushın” medalı tapsırıldı.
Bul sıylıq birinshi márte ǴMDA regionındaǵı mámleketke tapsırılıp atırǵanın atap ótiw kerek.
Bul húrmet elimizdiń veterinariya tarawında xalıqaralıq arenada abırayı hám potencialı barǵan sayın joqarılap baratırǵanınan dárek beredi.

I.AVVALBOEV, ÓzA