Prezident Shavkat Mirziyoev 31- may kúni Ózbekstan musılmanlar basqarması baslıǵı, muftiy shayx Nuriddin Holiqnazar menen telefon arqalı sóylesti.

Házirgi múbárek kúnlerde áziz watanlaslarımız Haj zıyaratı ushın Mekkede turıptı. Mámleketimiz basshısı olar ushın jaratılǵan sharayatlar, nuranıylardıń densawlıǵı hám keypiyatı haqqında soradı.
Muftiy háziretleri Haj ámellerin shın kewilden, tolıq orınlaw ushın barlıq shólkemlestiriw ilajları kórilgenin atap ótti.
Házirgi waqıtta 15 mıń hajılarımızdıń barlıǵı Saudiya Arabstanına jetip barǵan. Olarǵa 300 den aslam topar basshısı, 50 joqarı kategoriyalı shıpaker, 10 nan aslam aspazlar hám basqa da qánigeler joldaslıq etpekte.
Bıyıl, Ózbekstan tárepiniń talabına muwapıq, Arafat aymaǵındaǵı shatırlar jabıq tárizde qurıldı. Olardıń átirapı ıssılıq ótkermeytuǵın paneller menen oralǵan, suwıtıw sisteması ornatılǵan, gilem hám tósekler qoyılǵan. Bul házirgi jaz kúnlerinde zıyaratshılarǵa qosımsha qolaylıq jaratadı.
Bir sóz benen aytqanda, bıyılǵı haj máwsimine jáne de joqarı dárejede tayarlıq kórilip, barlıq zárúr sharayatlar tayarlandı. Bunnan qálbinde shúkirshilik sezimi tolǵan watanlaslarımız muqaddes orınlarda turıp, Jaratqannan elimizdiń tınıshlıǵı, xalqımızdıń abadanlıǵın sorap pátiya etpekte.
Muftiy Nuriddin Xoliqnazar Prezidentimizge ullı ibadat pazıyletleri menen júrgen hajılarımızdıń sálemi hám duwaların jetkerdi. Mámleketimiz basshısı barlıq zıyaratshılarǵa sálem jollap, elimizge saw-salamat keliwin tiledi.
Sóylesiw qızǵın hám kóterińki ruwxta ótti. Húrmetli hajılar Ózbekstanǵa qaytıp kelgennen soń, máhállelerde sociallıq ortalıqtı bekkemlew, mútáj insanlarǵa járdem beriw, jaslardı ilim-aǵartıwshılıqqa úgit-násiyatlawda úlgi kórsetetuǵınına úmit bildirildi.

ÓzA