Qazaqstan yadrolıq hám biologiyalıq qurallardıń tarqalmawı jolındaǵı siyasattı qatań túrde dawam ettiredi. Bul haqqında mámleket prezidenti Qasım-Jomart Toqaev 29-may kúni Astana xalıqaralıq forumındaǵı shıǵıp sóylegen sózinde atap ótti.

“Búgingi kúnde toǵız mámleket 13 mıńnan aslam yadro baslarınan ibarat ulıwma arsenalǵa iyelik etpekte. Ekspertler (yadro quralın) qollanıw qáwipi artıp atırǵanı hám bul hádiyse esap-sanaqta qátelik, tosınnan yamasa keskinlik sebepli júz beriwi múmkin ekeninen eskertpekte. Bir ǵana jarılıw qayǵılı aqıbetlerdi júzege keltiriwi múmkin. Ilimpazlardıń pikirinshe, (yadro quralınıń qollanılıwı) tikkeley wayran etiwlerden tısqarı, global klimat apatshılıǵı hám zúrááttiń nabıt bolıwına alıp keledi. Biz bul qanday apatshılıq ekenin bilemiz. Qazaqstan óz aymaǵında ótkerilgen 450 yadro sınaǵınıń tariyxıy aqıbetlerine elege shekem dus kelmekte. Biz tınıshlıq dep, (burınǵı Awqamnan) miyras bolıp qalǵan yadro arsenalınan waz keshtik,” – dedi Q.Toqaev.
Qazaqstan basshısı boylap urıslardıń háwij alǵanın qáweterli tendenciya dep bahalaǵan.
“Ótken jılǵı maǵlıwmatlarǵa qaraǵanda, 52 mámleket qurallı soqlıǵısıw jaǵdayında. Zorlıqlar aqıbetindegi ekonomikalıq shıǵınlar 19 trillion dollarǵa jetken, bul dúnya JIÓniń 13,5 procenti degeni. Bul sanlar artında qáweterli haqıyqatlıq jasırınǵan: zamanagóy kelispewshilikler barǵan sayın úzliksiz hám quramalı túrge enbekte,” – dedi siyasatshı.
Atap ótiliwinshe, házirgi jaǵdayda tariyxıy dáreje hám siyasiy dushpanlıq artınan baslanǵan urıslardı aqlap bolmaydı.
“Urıslarǵa kirisiwdiń ornına biz xalıqlarımız, birinshi gezekte, jas áwladtı rawajlanıwǵa erisiw hám aǵartıwshı jámiyetti qáliplestiriw jumısına tartıwımız kerek,” – dep juwmaqladı Q.Toqaev.
Maǵlıwmat ornında: 29-30-may kúnleri dawam etetuǵın Astana xalıqaralıq forumında (Astana International Forum) dúnya mámleketleri hám xalıqaralıq shólkemlerdiń jetekshileri, ilimiy hám kommerciyalıq topar wákilleri dúnya táǵdirine baylanıslı áhmiyetli máselelerdi dodalamaqta.

Qaraqalpaqstan xabar agentligi