“Ar-Rwya” basılımınıń xabarshısı Ibrohim Al-Hodiy Ózbekstan Respublikası húkimeti Oman puqaralarınıń mámleketimizge kiriw tártibin jeńillestirgenine, atap aytqanda, usı arab mámleketi puqaraları ushın 30 kún dawamında elimizde vizasız júriw qaǵıydasınıń engizilip atırǵanına itibar qaratqan.

– Eki tárepleme qatnasıqtı jáne de jaqsılaw, turistlik hám mádeniy birge islesiwdi keńeytiwge qaratılǵan háreket sheńberinde taslanǵan bul qádem óz-ara tereń tariyxıy baylanıslar, bekkemlenip atırǵan doslıqtı bildiredi, – deydi avtor. – Bul jeńillik usı jıl 1-iyunnen kúshke kiredi.
– Ózbekstan omanlı doslarımız bay mádeniy hám tariyxıy esteliklerimiz, dástúriy miymandoslıqtan tısqarı YuNESKO Dúnya miyrası dizimine kirgizilgen esteliklerimizdi ashıwı ushın keń imkaniyat jaratadı, – deydi elshi Abdusalom Hotamov. – Keyingi basqıshta mádeniy hám ekonomikalıq almasıwdı tereńlestiriw maqsetinde turizm kórgizbeleri, ekonomikalıq forumlar, Oman turistlik agentleri hám ǵalaba xabar quralları xızmetkerleri ushın tanısıw saparları sıyaqlı birgelikte ilajlar shólkemlestiremiz. Aviaciya tarawında “Oman Air”dı dizimnen ótkeriw procesi juwmaqlandı, Masqat hám Tashkent arasında tikkeley reysti jolǵa qoyıwǵa tayarlıq kórip atırmız. Biziń “Centrum Airlines” kompaniyamız bolsa Salalah qalasına máwsimlik reyslerdi ámelge asırmaqta. Bul ilajlar óz-ara sayaxattı ańsatlastıradı, turizmdi xoshametlewge xızmet etedi.

M.Pirmatova, ÓzA