Samarqand qalasındaǵı Kongress orayında Ózbekstan Respublikası Prezidenti Shavkat Mirziyoev hám Italiya Respublikası Bas ministri Jorja Melonidiń júzbe-júz hám rásmiy delegaciyalar qatnasıwındaǵı sóylesiwleri bolıp ótti.

Eki tárepleme strategiyalıq sheriklik qatnasıqların bunnan bılay da rawajlandırıw hám kóp táreplemeli birge islesiwdi keńeytiw máseleleri kórip shıǵıldı.
2023-jıl iyun ayında Rim qalasında bolıp ótken joqarı dárejedegi ushırasıwlarda erisilgen kelisimler izbe-iz ámelge asırılıp atırǵanı qanaatlanıwshılıq penen atap ótildi.
Keyingi jılları tovar almasıw kólemi, sonıń ishinde, jetkerip berilip atırǵan ónimlerdiń túriniń keńeyiwi esabınan derlik 3 esege arttı.
Birgeliktegi kárxana hám joybarlardıń sanı 2 esege kóbeydi. Italiyanıń jetekshi kompaniyaları menen metallurgiya, elektrotexnika, awıl xojalıǵı, sharwashılıq, turizm hám basqa da tarawlarda óz-ara paydalı kooperaciya jolǵa qoyılǵan.
Ózbekstan delegaciyası Veneciyadaǵı biennalede belsene qatnastı, Florenciyada kórgizbe ótkerildi. Ótken jılı dekabr ayında Rim hám Viarejo qalalarında Ózbekstan mádeniyatı kúnleri bolıp ótti.
Mámleketimizde Turin hám Piza universitetleriniń filialları tabıslı jumıs alıp barmaqta. Aprel ayında rektorlardıń ekinshi forumı nátiyjeli ótti.
Tárepler jedel siyasiy almasıwdı dawam ettiriwdi qollap-quwatladı.
Usı jıldıń aprel ayında Samarqandta bolıp ótken nátiyjeli sammitke muwapıq Evropa Awqamınıń institutları menen jedel birge islesiw dawam ettiriledi. Ámeliy nátiyjelerge itibar qaratqan halda “Oraylıq Aziya – Italiya” sammitin ótkeriw áhmiyetli ekenligi atap ótildi.
Sawda tarawında bizneske texnikalıq járdem baǵdarlamaların keńeytiwge kelisip alındı. Evropa Awqamı bazarına shıǵıw ushın ózbekstanlı eksportyorlardı oqıtıw, Tashkentte birgeliktegi Sertifikaciyalaw orayın shólkemlestiriw, Muwapıqlıqtı bahalaw haqqındaǵı kelisimdi qabıl etiwdi jedellestiriw usılardıń qatarına kiredi.
Mámleketimiz basshısı Italiyanıń jetekshi kompaniyaları menen Texnologiyalıq sheriklik baǵdarlamasın iske qosıwdı usınıs etti.
Jeke menshik isbilermenliktiń innovaciyalıq joybarları, oǵada áhmiyetli minerallar hám awıl xojalıǵı shiyki zatın tereń qayta islew, avtomobil qurılısı ushın komplektlewshi bólekler, elektrotexnika, energetika, azıq-awqat, farmacevtika, qurılıs sanaatında joqarı texnologiyalıq ónimler islep shıǵarıw, toqımashılıq, bılǵarı, mebel qurılısı hám basqa da tarmaqlar ushın dizayn orayların shólkemlestiriw tiykarǵı baǵdarlar sıpatında atap ótildi.
Bunday joybarlar Evropa operatorı basqarıwında Tashkent wálayatında shólkemlestiriletuǵın sanaat parkine jaylastırılıwı múmkin.
Joybarlardı qollap-quwatlawdıń jańa mexanizmlerin iske qosıw ushın birgeliktegi investiciyalıq fondtı shólkemlestiriw, sonday-aq, Italiyanıń “SACE” hám “SIMEST” mámleketlik agentliklerin tartıw máselesi kórip shıǵıladı.
Kompleksli “jol kartası” tiykarında awıl xojalıǵında keń kólemli ilimiy-texnologiyalıq birge islesiwdi rawajlandırıwǵa ayrıqsha itibar qaratıldı. Júzim, zaytun, shafran, sparja jetistiriw, agrolaboratoriyalar shólkemlestiriw, biotexnologiyalardı rawajlandırıw hám agroqamsızlandırıwdı engiziw boyınsha kooperaciyalıq perspektivalar atap ótildi.
Jańa joybarlardı alǵa qoyıw maqsetinde Húkimetleraralıq topar jumısın qayta tiklew hám onıń májilisin biznes forum menen birge ótkeriwge kelisip alındı.
Ózbekstan hám Italiya aymaqları arasındaǵı sheriklik qatnasıqların keńeytiw sheńberinde Lombardiya gubernatorı Attilio Fontananıń saparı hám birinshi Aymaqlar forumı sheńberinde ámeliy nátiyjelerge erisiw áhmiyetli ekeni atap ótildi.
Bilimlendiriw tarawında mámleketimizde Tushiya universitetiniń filialın, Piza, Trento, Roma Tre hám Ka-Foskari universitetleri menen eki tárepleme diplom baǵdarlamaların iske qosıw rejeleri qollap-quwatlandı.
Ózbekstanda Italiya mádeniyatı kúnlerin ótkeriwge kelisip alındı.
Sapar sheńberinde miynet migraciyası tarawında sistemalı birge islesiwdi jolǵa qoyıwǵa qaratılǵan kelisimge qol qoyılǵanı qanaatlanıwshılıq penen atap ótildi.
Ushırasıw juwmaǵında erisilgen kelisimlerdi ámelge asırıw boyınsha kompleksli “jol kartası”n tayarlaw haqqında qarar qabıl etildi.

ÓzA