Prezident Shavkat Mirziyoev temir jollardı rawajlandırıw ilajları boyınsha prezentaciya menen tanıstı.

Mámleketimiz basshısınıń 2023-jıl 10-oktyabrdegi qararına muwapıq, bul taraw pútkilley reformalanbaqta. “Ózbekstan temir jolları” akcionerlik jámiyeti strukturalıq jaqtan ózgertilip, tarawlıq emes imarat, tutas jer hám artıqsha wazıypalar qısqartıldı. Nátiyjede aldın zıyan menen islep kelgen kompaniya ótken jılı 47 milliard sum sap payda menen shıqtı. “Temiryoʻlkargo” kompaniyası shólkemlestirilgennen soń, júk vagonlarınan paydalanıw nátiyjeliligi 2 esege arttı.
Biraq ele imkaniyatlar kóp. Prezentaciyada taraw infrastrukturasın rawajlandırıw hám dáramattı arttırıw wazıypaları kórsetip ótildi.
Atap aytqanda, tranzit júklerin tasıw quwatlılıǵınan tolıq paydalanılmay atır. Onı kelesi jıllarda 40 procentke arttırıw arqalı dáramattı 2 esege kóbeytiw múmkin.
Máselen, birinshi márte Qıtay – Túrkiya jónelisi boyınsha júk poezdlarınıń qatnawı jolǵa qoyıldı. Elimizge jańa poezdlar alıp kelinip, qatnawlar jıldan-jılǵa kóbeymekte. Sol sebepli temir jol infrastrukturasınıń ótkeriwsheńligin izbe-iz arttırıp barıw zárúr ekenligi atap ótildi.
Bul másele, ásirese, Tashkent átirapında áhmiyetli. Házir sırtqı júklerdiń 70 procenti “Shuqırsay” stanciyası arqalı tasılmaqta. Geyde buǵan bir neshe kún waqıt jumsalıp, artıqsha qárejet hám gezek kútiwge sebep bolmaqta.
Sol sebepli júk stanciyaların paytaxt aymaǵınan sırtqa shıǵarıw, Yangiywl rayonı hám Jańa Tashkent janında iri stanciyalar qurıw usınıs etilmekte. Sonday-aq, paytaxtımızdı aylanıp ótetuǵın “Ozodlik – Yangier” temir jolınıń qurılısı názerde tutılǵan. Nátiyjede Ferǵana oypatlıǵı menen basqa wálayatlar arasındaǵı júk tasıwlar Tashkent qalasına kirmesten ámelge asırıladı.
Jańa joybarlardan jáne biri Samarqand – Urgut jolı. Házirgi waqıtta jumıslar baslanıp, 7 kilometr temir jollar jatqarılǵan. Bul jónelistiń jámi uzınlıǵı 54 kilometr bolıp, 2 vokzal, “Urgut” ekonomikalıq zonasında 2 júk stanciyası qurıladı.
Vokzallarǵa kirip-shıǵıw tártibi, xızmetlerdiń sapası máselelerine de toqtap ótildi. Jolawshılar háreketine qolaylıq jaratıw, turistler ushın sharayattı jaqsılaw, avtomobil turatuǵın orınlardı keńeytiw wazıypaları atap ótildi.
Juwapkerler, sonday-aq, elektropoezdlar alıp keliw, xızmet sapasın jaqsılaw rejeleri boyınsha málimleme berdi.

ÓzA