Ózbekstan Respublikası Prezidenti Shavkat Mirziyoev 27-may kúni mámleketimizde sapar menen bolıp turǵan BMSh Balalar qorı (YuNISEF) atqarıwshı direktorı Ketrin Rasseldi qabılladı.

BMSh sistemasındaǵı bul jetekshi qánigelesken institut penen kóp tárepleme birge islesiwdi bunnan bılay da keńeytiw máseleleri dodalandı.
Ushırasıw aldınan YuNISEF basshısı Ózbekstan jetekshisine BMSh Bas xatkeri Antoniu Guterrishtiń qızǵın sálemin jetkerdi.
Mámleketimizde ámelge asırılıp atırǵan reformalardıń nátiyjelerine joqarı baha berilip, balalardıń huqıqların támiyinlew hám imkaniyatların keńeytiw tarawındaǵı milliy baǵdarlama qollap-quwatlandı.
Ózbekstan hám YuNISEF arasındaǵı birge islesiw keyingi jıllarda joqarı dárejege shıqqanı úlken qanaatlanıwshılıq penen atap ótildi.
Shólkemniń járdeminde mámleketimizde balalardı zorlıqtan qorǵaw boyınsha nızam, xalıqtı sociallıq qorǵaw hám balalar onkologiyasına qarsı gúresiw tarawında strategiyalıq hújjetler qabıl etildi. Koronavirus pandemiyasına qarsı gúresiw hám vakcinaciya sistemasın rawajlandırıwǵa járdem berildi.
Nızamshılıqtı jetilistiriw, balalardı tárbiyalaw hám qollap-quwatlawdıń jańa mexanizmlerin engiziw, sociallıq xızmet hám kadrlar tayarlaw sistemasın rawajlandırıw, sociallıq xızmetlerden paydalanıw imkaniyatın keńeytiw hám olardıń sapasın jaqsılaw, milliy standartlardı islep shıǵıw, sociallıq qamsızlandırıwdı keńeytiw, inklyuziv bilimlendiriwdi rawajlandırıw hám basqa da tiykarǵı baǵdarlarda birgeliktegi ilajlardı ámelge asırıw áhmiyetli ekenligi atap ótildi.
2030-jılǵa shekem mólsherlengen jańa Mámleketlik baǵdarlamanı qabıl etiw, sonday-aq, balalardıń huqıqların qorǵaw hám máplerin alǵa qoyıw máseleleri boyınsha bir qatar xalıqaralıq ilajlardı birgelikte ótkeriwge kelisip alındı.

ÓzA