27-may kúni Ministrler Kabinetinde Ózbekstan Respublikası Bas ministri Abdulla Aripov Pútkil jer júzilik intellektuallıq múlk shólkeminiń Bas direktorı Daren Tang penen ushırasıw ótkerdi.

Daren Tang Ózbekstanda intellektuallıq múlk obektleriniń isenimli huqıqıy qorǵalıwın támiyinlewge qaratılıp atırǵan ayrıqsha itibar ushın Mámleketimiz basshısı Shavkat Mirziyoevqa minnetdarshılıq bildirdi.
Óz gezeginde, Pútkil jer júzilik intellektuallıq múlk shólkemi tárepinen elimizde intellektuallıq múlk tarawın reformalaw hám jetilistiriw, huqıqıy qorǵawdı kúsheytiw baǵdarında ámelge asırılıp atırǵan reformalar qollap-quwatlanıp kiyatırǵanı atap ótildi.
Ushırasıw dawamında 2026-2030-jıllarda Ózbekstanda intellektuallıq múlk tarawın rawajlandırıw strategiyası joybarı boyınsha jumıslardı birgelikte ámelge asırıw, mámleketimizde intellektuallıq múlk tarawında jumıs alıp barıp atırǵan qánigelerdiń mamanlıǵın arttırıw, Tashkent mámleketlik yuridikalıq universitetiniń intellektuallıq múlk baǵdarı magistraturası tiykarında Pútkil jer júzilik intellektuallıq múlk shólkeminiń birgeliktegi magistratura baǵdarlamasın islep shıǵıw hám ámelge asırıw máseleleri dodalandı.
Sonday-aq, Pútkil jer júzilik intellektuallıq múlk shólkeminiń jasıl ekonomika, klimat ózgeriwi hám azıq-awqat qáwipsizligi baǵdarlarındaǵı “WIPO Green” baǵdarlamasına Ózbekstan juwapkerlerin jedel tartıw, mámleketimizde jetistiriletuǵın awıl xojalıǵı ónimlerine baylanıslı intellektuallıq múlkti qorǵaw baǵdarındaǵı birgeliktegi baǵdarlamasın ámelge asırıw máseleleri boyınsha da hár tárepleme pikir alısıldı.

Qaraqalpaqstan xabar agentligi