Ózbekstan Respublikası Prezidenti janındaǵı Sociallıq qorǵaw milliy agentliginiń Qaraqalpaqstan Respublikası basqarması tárepinen Kekseler hám mayıplıǵı bolǵan shaxslar, urıs hám miynet veteranları ushın “Taqıyatas” sanatoriyasına ǵalaba xabar qurallarınıń wákilleri ushın press-tur shólkemlestirildi.

Bul úsh qabatlı sanatoriya dáslep 1978-jılı Taqıyatas GRES kárxanası sanatoriya-profilaktoriyası bolıp shólkemlestirilgen.
Sońǵı jıllarda bir qatar unamlı ózgerisler ámelge asırılıp, Ózbekstan Respublikası Prezidentiniń 2023-jıl 1-iyun kúngi “Xalıqqa sapalı sociallıq xızmet hám járdem kórsetiw jáne onı nátiyjeli qadaǵalaw sistemasın jolǵa qoyıw boyınsha kompleksli ilajlar haqqında”ǵı pármanı hám “Ózbekstan Respublikası Prezidenti janındaǵı Sociallıq qorǵaw milliy agentliginiń jumısın shólkemlestiriw haqqında”ǵı qararına muwapıq, Kekseler hám mayıplıǵı bolǵan shaxslar, urıs hám miynet veteranları ushın “Taqıyatas” sanatoriyası jańadan shólkemlestirilgen Ózbekstan Respublikası Prezidenti janındaǵı Sociallıq qorǵaw milliy agentliginiń qaramaǵına ótkerildi.
Sanatoriya Ózbekstan Respublikası wálayatları hám Qaraqalpaqstan Respublikasınıń rayonlıq medicinalıq-sociallıq bólimleri tárepinen jollama tiykarında keliwshi dem alıwshılar ushın, jámi 75 orınǵa mólsherlengen bolıp, oǵan qosımsha xalıqqa tólemli xızmet kórsetiw bólimi de ashıldı.
Sanatoriyanıń tiykarǵı profili háreket-tayanısh hám nerv sisteması keselliklerin emlew ushın mólsherlengen.
Onıń birinshi qabatında emlew bólmeleri jaylasqan bolıp, onda fizioterapiya, ozekerit parafin, UVCH, darsenval, LFK (fizikalıq shınıǵıw, trenajyorlarda shınıǵıw), massaj, elektroforez, amplipuls, ultrases, svetovanna, lazer terapiyası, ingalyaciya, tubus KVARC, ultra ses (UZT), elektro-sandal terapiya, elektromassaj kushetkası, fitobar, stomatologiya, nuga-best, ozonoterapiya, omırtqa baǵanasın tartıw kushetkası, moyın omırtqaların tartıw kreslosı, ayaqtan tartıw apparatı, magnitoterapiya apparatı (trakcion krovat, zinda apparatı, ishek juwıw), emlew vannası (kedrovaya bochka, aylanba dush, monshaqlı vanna, mineral vanna, sharko dush, kóterilgen dush, suw astı massajı) hám basqa EKG, UZI sıyaqlı tekseriw kabinetleri, xızmet túrleri bar.
– Barlıq medicinalıq apparatlar mámleketlik standart qadaǵalawınan ótkerilgen,-deydi usı sanatoriyanıń bas shıpakeri A.Madaminov. – Sonday-aq, sanatoriyada sońǵı jıllarda keń kólemli iri ońlaw jumısları, zamanagóy ásbap-úskeneler menen qayta úskenelew ilajları ámelge asırılıp, onıń kelbeti hám xızmet kórsetiwdiń sapası pútkilley ózgerdi.
Ekinshi hám úshinshi qabatlarda jataqxanalar hám jumıs xanaları jaylasqan. Jataqxanalardıń hár biri eki adamlıq bolıp, tólemli xızmet kórsetiw bóliminiń 8 xanası ápiwayı xana, jáne 8 xanası yarım lyuks hám 9 xanası lyuks xanalar bolıp, barlıq xanalarda dem alıwshılarǵa qolaylı sharayatlar jaratılǵan.
Kekseler hám mayıplıǵı bolǵan shaxslar, urıs hám miynet veteranları ushın 2024-jıl dawamında 2156 nuranıyǵa jollama tiykarında, 1510 puqaraǵa tólemli xızmet kórsetiw tiykarında xızmet kórsetildi. Al, 2025-jıldıń 1-sheregi juwmaǵı boyınsha, jollama menen jámi 554 nuranıy, 312 puqaraǵa tólemli xızmet kórsetiw tiykarında xızmet kórsetildi. 1-may jaǵdayına bolsa 752 nuranıy, 452 puqaraǵa tólemli xızmet kórsetiw tiykarında xızmet kórsetildi.
2024-jıldan baslap sanatoriyaǵa jollama menen kelgen shaxslardı qabıl etiw hám olardı “Chek in-Chek out” sisteması arqalı rásmiylestiriw jumısları jolǵa qoyılǵan hám hámmesi óz waqtında ámelge asırılıp kelinbekte.
Sanatoriyada dem alıwshılardıń kewlin kóteriw maqsetinde hár háptede “Humo” toparı, Taqıyatas mádeniyat úyi xızmetkerleri hám respublikamızdıń bir qatar belgili qosıqshılarınıń atqarıwında koncert baǵdarlaması qoyıp beriledi. Hár bir bayramdı joqarı dárejede ótkeriw ushın belgili artistler mirát etiledi. Bul ilajlarǵa qosımsha zıyarat orınlarına alıp barılıp zıyaratlar shólkemlestiriledi. Muzeylerge, tariyxıy obektlerge ekskursiyalar shólkemlestirilip, bos waqıtlarında shaxmat, shashka oyınları ótkeriledi hám jańa gazeta-jurnallar menen tanısıp, kitapxanadan ádebiy kitaplar alıp oqıydı hám televizor tamasha etedi.
Taqıyatas rayonlıq kitapxanasınan shártnama tiykarında ádebiy hám kórkem kitaplar alınıp, házirgi kúnde kitapxanada 1000 ǵa shamalas ózbek, qaraqalpaq, rus hám qazaq tillerindegi ádebiy hám kórkem kitaplar bar.
Sonday-aq, agentlik sistemasında tájiriybe-sınaw túrinde basqalardıń kútimine mútáj shaxslarǵa úyde medicinalıq-sociallıq reabilitaciya xızmetin kórsetiw jolǵa qoyıldı. Sonıń ishinde, sanatoriyada da usı jıl 28-fevraldan baslap Taqıyatas rayonı «Insan» sociallıq orayı tárepinen biriktirilgen 5 jeke jalǵız, basqalardıń kútimine mútáj insanlarǵa úyde medicinalıq-sociallıq reabilitaciya xızmeti ámelge asırılıp kelinbekte.
Ózbekstan Respublikası Prezidentiniń 2025-jıl 8-maydaǵı “Basqalardıń kútimine mútáj shaxslarǵa sociallıq xızmetler kórsetiwdiń kólemin keńeytiw ilajları haqqında”ǵı qararına tiykarlanıp, usı jıldıń 1-iyun kúninen baslap basqalardıń kútimine mútáj eresek shaxslardı qollap-quwatlawǵa qaratılǵan “Faol hayotga qadam” baǵdarlaması engizilip, sanatoriyda da xızmetti tolıq jolǵa qoyıw jumısları ámelge asırıladı.
– Men Beruniy rayonınan kelip emlenip atırman. Rayondaǵı «Insan» sociallıq xızmetler orayınan jollama aldım. Kóp jıl muǵallim bolıp isledim. Házirgi waqıtta napaqadaman. Bul sanatriyada barlıq sharayatlar jaratılǵan eken. Jaqsı qarap atırıptı. Ayaǵım awıratuǵın edi. Házir awırǵanı qoydı. Shıpakerlerge minnetdarshılıq bildiremen,-deydi Sh.Jamatov.
Press-tur dawamında qatnasıwshılar emleniwshiler ushın jaratılǵan sharayatlar menen tanısıp, qızıqtırǵan sorawlarına juwap aldı.

Á.Jiyemuratov,
Qaraqalpaqstan xabar agentligi