2025-jıl 23-may kúni Oliy Majlis Senatınıń Baslıǵı Tanzila Norboeva Qırǵız Respublikasınıń Ózbekstandaǵı Ayrıqsha hám tolıq huqıqlı elshisi Duyshonqul CHotonov penen ushırasıw ótkerdi. Sóylesiw waqtında Ózbekstan hám Qırǵızstan arasındaǵı eki tárepleme baylanıslar, ásirese, keyingi jılları turaqlı rawajlanıp atırǵan birge islesiw máseleleri dodalandı.

Ushırasıwda eki mámleket arasındaǵı qatnasıqlardıń jedel rawajlanıwında eki mámleket jetekshileriniń siyasiy erk-ıqrarı hám óz-ara isenimge tiykarlanǵan sóylesiwleri sheshiwshi rol atqarǵanı ayrıqsha atap ótildi. Atap aytqanda, joqarı dárejedegi turaqlı ushırasıwlar menen sapar etiwler eki tárepleme birge islesiwdiń bekkem tiykarların qáliplestiriwge xızmet etpekte.
Tárepler parlamentleraralıq birge islesiw máselelerine de ayrıqsha itibar qarattı. Oliy Majlis hám Jogorku Kenesh arasında jumıs alıp barıp atırǵan parlamentleraralıq komissiya sheńberinde hár qıylı aymaqlarda turaqlı túrde májilisler shólkemlestirilip atırǵanı tek ǵana parlamentleraralıq baylanıslardı emes, al aymaqlararalıq birge islesiwdi keńeytiwge de unamlı tásir kórsetip atırǵanı atap ótildi.
Sonday-aq, ushırasıwda Ózbekstan hám Qırǵızstan xalıqları arasındaǵı tariyxıy doslıq hám jaqsı qońsıshılıq qatnasıqların bekkemlew boyınsha birgeliktegi joybarlar menen baslamalardı ámelge asırıw boyınsha eki tárep óz-ara mápdar ekenin bildirdi. Tárepler bul baǵdarda óz-ara awızbirshilikte islesiwge tayar ekenligin jáne bir márte tastıyıqladı.

Qaraqalpaqstan xabar agentiligi