Turizm hám ishki sayaxattı jáne de qolaylastırıw maqsetinde húkimetimiz tárepinen úlken qádem qoyıldı. Endi mámleketimizdiń túrli múyeshlerinen seyil etiw hám miymanxanalarda toqtaw jáne de ańsat boladı.

Ózbekstan puqaraları Birden-bir milliy turizm platforması arqalı miymanxanada orın bánt eter eken, óz shaxsın tastıyıqlaytuǵın hesh qanday qaǵaz hújjet usınıwı shárt bolmaydı. Tek ǵana MyID sistemasında identifikaciyadan ótiwdiń ózi jeterli.
Bul imkaniyat Prezidentimizdiń turistler aǵımın arttırıw boyınsha qabıl etilgen pármanı tiykarında turmısqa engizilmekte. Texnologiyalar járdeminde elimizde turizm tarawı jańa basqıshqa kóteriliwi kútilmekte.
2025-jılı 1-sentyabrden iske qosılıwı rejelestirilgen Birden-bir milliy turizm platforması tek miymanxana bánt etiwdi emes, al avto ijara hám attrakcionlar, gid hám ekskursovod xızmetlerin de bir orında usınıs etedi.
Miymanxanalardıń jeke kabinetleri QR -kod yamasa tanıs sisteması arqalı miymanlardı avtomatikalıq identifikaciyalaw imkaniyatına iye boladı. Bul bolsa waqıttı únemleydi, artıqsha hújjetpazlıqtı saplastıradı hám sayaxattı jaǵımlı etedi.
Qalaberdi, bul ekonomikaǵa da payda. Endi sayaxat etiw, shańaraq penen dem alıw, Ózbekstannıń gózzal aymaqları menen tanısıw ushın hesh qanday tosqınlıq qalmadı. MyID arqalı hár bir puqara óz sayaxatın biymálel rejelestire aladı.
Jańa imkaniyatlardan únemli paydalanıń. Elimiz boylap sayaxattı baslań.

Qaraqalpaqstan xabar agentligi