Lyublyana qalasındaǵı Prezident sarayında Ózbekstan Respublikası Prezidenti Shavkat Mirziyoev hám Sloveniya Respublikası Prezidenti Natasha Pirc Musardiń tar sheńberdegi rásmiy delegaciyalar qatnasıwındaǵı sóylesiwleri bolıp ótti.
Ushırasıw aldınan mámleketimiz basshısı Sloveniya jetekshisine qızǵın qabıllaǵanı ushın minnetdarshılıq bildirip, sońǵı 20 jılda birinshi ret ótkerilip atırǵan joqarı dárejedegi ilajlar eki mámleket qatnasıqlarında jańa basqıshtıń baslanıwı sıpatında tariyxqa kiretuǵının atap ótti.
Ózbekstan hám Sloveniya arasındaǵı ámeliy birge islesiwdi jáne de rawajlandırıwdıń áhmiyetli máseleleri kórip shıǵıldı.
Siyasiy sóylesiw, túrli dárejedegi baylanıslar hám isbilermenlik ushırasıwlarınıń jedelleskeni qanaatlanıwshılıq penen atap ótildi. Eki mámleket BMSh hám basqa da xalıqaralıq strukturalar sheńberinde bir-birin qollap-quwatlap kelmekte.
Keyingi jılları tovar almasıw 3 esege kóbeydi. Mádeniyat hám turizm tarawlarındaǵı almasıwlar keńeymekte. Ózbekstanda Sloveniya puqaraları ushın vizasız rejim engizilgen.
Eki tárepleme qatnasıqlardı sistemalı túrge engiziw ushın joqarı dárejedegi turaqlı sóylesiwdi jolǵa qoyıw áhmiyetli ekenligi atap ótildi.
Tovar almasıwdı kóbeytiw hám onıń kólemin, bárinen burın, ónimlerdiń túrin keńeytiw hám importtıń ornın basıw esabınan birinshi basqıshta 500 million evroǵa jetkeriw máselelerine ayrıqsha itibar qaratıldı.
Ózbekstannan toqımashılıq, miywe-ovoщlar, mineral tóginler, mıs ónimleri hám basqa da sanaat tovarları, Sloveniyadan bolsa dári-dármaqlar, aldınǵı texnologiyalar hám úskeneler jetkerip beriw usılardıń qatarına kiredi.
Sloveniyanıń “Koper” portınıń potencialınan Evropa Awqamı bazarına shıǵıw ushın logistika xabı sıpatında paydalanıw imkaniyatları úyreniledi.
Sloveniyanıń jetekshi kompaniyaları menen Sanaat kooperaciyası baǵdarlamasın qabıl etiw, sonday-aq, zamanagóy ásbap-úskeneler, sanaat hám awıl xojalıǵı ónimlerin islep shıǵarıw, farmacevtika ónimleri, sonıń ishinde, pal hám shıpalı ósimliklerge tiykarlanǵan dári islep shıǵarıwdı lokalizaciyalaw, energetika obektlerin qurıw hám modernizaciyalaw baǵdarında joybarlardı ámelge asırıw boyınsha kelisimlerge erisildi.
Miynet migraciyası tarawında sistemalı birge islesiw ushın til, kásiplik kónlikpeler hám miynet standartları boyınsha oqıtıw hám beyimlestiriw baǵdarlamaların islep shıqqan halda Shólkemlesken miynet migraciyası haqqındaǵı kelisimdi tayarlawǵa kelisip alındı.
Turizmdi, ásirese, awıllıq hám tawlı aymaqlarda rawajlandırıw perspektivalı baǵdar sıpatında belgilendi. Bilimlendiriw tarawında tárepler diplomlardı óz-ara tán alıw haqqındaǵı kelisimge qol qoyıwǵa hám Lyublyana hám Maribor universitetleri menen birgeliktegi bilimlendiriw baǵdarlamaların jolǵa qoyıwǵa kelisip aldı.
Bunnan tısqarı, kelesi jılı Tashkent qalasında eki mámlekettiń joqarı bilimlendiriw mákemeleri hám ilimiy oraylarınıń qatnasıwında Jaslardıń innovaciyalıq joybarları forumı ótkeriledi.
Gumanitarlıq almasıwdı bekkemlew maqsetinde tárepler óz-ara mádeniyat kúnleri hám Lyublyana qalasında Ózbek kino hápteligin ótkeriw baslamasın alǵa qoydı.
Belgilengen barlıq wazıypalardıń orınlanıwın támiyinlew maqsetinde Húkimetleraralıq komissiyanıń birinshi májilisin usı jıldıń iyul ayında Lyublyana qalasında shólkemlestiriwge qarar etildi.
Ushırasıw juwmaǵında mámleketimiz basshısı Sloveniya Prezidenti Natasha Pirs Musardı ózi ushın qolaylı waqıtta juwap saparı menen Ózbekstanǵa keliwge mirát etti.
ÓzA