Jaslardıń siyasiy-huqıqıy bilim hám kónlikpelerin arttırıw, olardı nızam dóretiwshiligi procesine keńnen tartıw, jas áwladtıń siyasiy belsendiligin arttırıwda Jaslar parlamenti áhmiyetli institutqa aylanbaqta.

Jaslar parlamentiniń hár bir aǵzası ózi jasaytuǵın aymaq jaslarınıń mashqalaların úyrenip, sebeplerin anıqlap, onı jaslar arasında dodalaw arqalı saplastırıw ilajların kórip atırǵanın atap ótiw kerek. Qalaberdi, nızam dóretiwshiligi procesine qatnasıp, zamanlaslarınıń tilek-ótinishlerin nızamshılıqqa engiziw, olardıń usınısların parlamentke alıp shıǵıwǵa umtılmaqta.
Usı jıldıń 23-30-aprel kúnleri Ózbekstan Respublikası Oliy Majlisi Nızamshılıq palatası janındaǵı Jaslar parlamentiniń jańa quramı ushın gezektegi saylawlardıń respublikalıq basqıshı bolıp ótti.
Oliy Majlis Nızamshılıq palatası Keńesiniń “Ózbekstan Respublikası Oliy Majlisi Nızamshılıq palatası janındaǵı Jaslar parlamentiniń jumısın jetilistiriw haqqında”ǵı qararına muwapıq Jaslar parlamentine saylawlar úsh basqıshta bolıp ótkenin atap ótiw kerek. Usı qarar tiykarında siyasiy partiyalar tárepinen Nızamshılıq palatası janındaǵı Jaslar parlamenti aǵzaların saylaw tártibi haqqındaǵı rejeleri tastıyıqlandı.
20-mart – 1-aprel kúnleri siyasiy partiyalarda Jaslar parlamentine saylawlardıń birinshi basqıshı barlıq rayon hám qalalarda bolıp ótti. Usı basqıshta respublika boyınsha jámi 9 mıń 531 arza kelip túsken. Rayon (qala)lıq tańlaw basqıshı tóreshiler quramınıń juwmaǵına bola, jámi 2 mıń 493 qatnasıwshı saylawdıń ekinshi – aymaqlıq basqıshında qatnastı. Aymaqlıq basqıshlardan bolsa jámi 530 qatnasıwshı saylawdıń úshinshi – siyasiy partiyalar tárepinen respublikalıq basqıshında qatnastı.
Respublikalıq basqısh juwmaǵına bola, usınıs etilgen 150 talabannıń dizimi Oliy Majlis Nızamshılıq palatasınıń Jaslar máseleleri boyınsha komissiyasına usınıldı. Jaslar parlamenti aǵzaları siyasiy partiyalardıń Nızamshılıq palatasında iyelegen deputatlıq orınlarına proporcional túrde tómendegi orınlarǵa iye boldı: 64 i ÓzLiDeP, 29 ı “Milliy tiklanish,” 21 i “Adolat” SDP, 20 sı XDP, 16 sı Ekopartiyaǵa tuwra keledi.
Jaslar parlamentiniń jańa quramı jaslar máselelerin sheshiw, jaslardıń huqıqları menen máplerin qorǵaw, ideyaları menen baslamaların júzege shıǵarıw hám olardı reformalar procesine jedel tartıwda intaker boladı.

Muhtarama Komilova, ÓzA