Prezident Shavkat Mirziyoev seysmikalıq qáwipsizlikti kúsheytiw ilajlarına baylanıslı usınıslardıń prezentaciyası menen tanıstı.

Mámleketimizde dóretiwshilik kólemi keń. 2017-jıldan berli orınlarda 11 mıń 410 kóp qabatlı turaq jaylar qurılǵan. Bul xalıqtı turaq jay menen jeterli dárejede támiyinlew, turmıs sharayatların jaqsılawǵa xızmet etpekte.
Qurılıstıń tiykarlarınan biri bolǵan seysmologiya tarawı da rawajlanbaqta. Bul baǵdarda sırt el ilimiy orayları menen birge islesip, innovaciyalıq texnologiyalardı engiziwge itibar qaratılmaqta. Sonıń menen birge, mámleketimiz kóp tarawlarda baslamashı bolıp esaplanadı.
Bizge belgili, 1966-jılı 26-aprelde Tashkent qalasında wayran etiwshi jer silkiniw júz bergen. Ózbekstan Prezidenti jer silkiniw qurbanlarına húrmet kórsetiw hám bul baǵdarda xalıqaralıq birge islesiw zárúr ekenligin esletiw maqsetinde eslew hám tilekleslik kúnin shólkemlestiriw baslamasın alǵa qoyǵan edi. Bunıń tán alınıwı sıpatında, jaqında BMSh Bas Assambleyası 29-apreldi Xalıqaralıq jer silkiniw qurbanların eslew kúni, dep járiyalaw haqqında rezolyuciya qabıl etti.
Bul tarawda xalıqaralıq standartlarǵa say bolıw ushın mámleketimiz basshısı jańadan qurılıp atırǵan jaylardıń sapasına itibardı kúsheytiw wazıypasın qoyǵan edi. Soǵan muwapıq, kóp qabatlı turaq jaylardıń jer silkiniwge shıdamlılıǵın arttırıw hám xalıqtıń seysmikalıq qáwipsizligin támiyinlew ilajları kórilmekte.
Sonıń ishinde, mámleketlik joybarlaw institutlarınıń qánigeleriniń qatnasıwında orınlarda úyreniwler ótkerildi. Usı úyreniw nátiyjeleri hám aymaqlardıń seysmikalıq jaǵdayınıń analizi tiykarında bul sistemanı bunnan bılay da jetilistiriw boyınsha usınıslar islep shıǵıldı.
Oǵan bola, sırt elli qánigeler tartılǵan halda, imaratlardı úyreniw boyınsha jańa ámeliyat jolǵa qoyıladı. Jer silkiniwine hám basqa da tábiyǵıy apatshılıqlarǵa shıdamlı turaq jaylardı qurıw boyınsha tájiriybe almasıw keńeytiledi. Imaratlar instrumental texnikalıq tekseriwden ótkerilip, kemshilikler saplastırıladı.
Bul úyreniwler hám sırt el tájiriybesi tiykarında, seysmikalıq qáwipti, tásirdi hám qáwipti bahalaw boyınsha normativlik hújjetlerge ózgerisler kirgiziledi.
Mámleketimiz basshısı qurılısta sapa hám qáwipsizlik birinshi orında ekenin atap ótip, bul baǵdarlardı ilimiy rawajlandırıw, tarawǵa zamanagóy kózqaraslardı engiziw boyınsha kórsetpeler berdi.

ÓzA