Rásmiy sapar menen Tegeran qalasında bolıp turǵan Ózbekstan Respublikası Bas ministri Abdulla Aripovtı 12-may kúni, Iran Islam Respublikası Prezidenti Masud Pezeshkiyon qabıl etti. Bul haqqında Ózbekstan Respublikası húkimet portalında xabar berilmekte.

Sóylesiw aldınan, Ózbekstan tárepi mámleketimiz delegaciyasına kórsetilip atırǵan miymandoslıq ushın Iran jetekshisine minnetdarshılıq bildirip, Prezidentimiz Shavkat Mirziyoevtiń jollaǵan qızǵın sálemi hám jaqsı tileklerin jetkerdi.
Ushırasıwda eki mámleket Basshısınıń isenimli siyasiy erk-ıqrarı sebepli óz-ara birge islesiw keń kólemli qatnasıqlar dárejesine kóterilgeni, joqarı dárejede erisilgen kelisimlerdiń ámeliy orınlanıwı regionnıń turaqlılıǵı ushın da áhmiyetli ekeni ayrıqsha atap ótildi.
Sonday-aq, eki tárepleme qatnasıqlardıń tiykarǵı baǵdarı bolǵan sawda-ekonomikalıq hám investiciyalıq, sanaat kooperaciyası, transport hám logistika, aymaqlararalıq hám mádeniy-gumanitarlıq baǵdarlarda erisilgen kelisimlerdiń orınlanıwın támiyinlew máselelerine de ayrıqsha itibar qaratıldı.
Elimiz delegaciyası Tegeranǵa saparı sheńberinde Iran innovaciyalar hám texnologiyalar úyine de barıp, energetika, medicina hám farmacevtika, awıl xojalıǵı, IT, qurılıs sıyaqlı tarawlardaǵı aldınǵı ónim hám qollanbalar menen tanıstı.
Sonıń menen Ózbekstan húkimeti delegaciyasınıń Iranǵa saparı juwmaqlandı.

ÓzA