Usı kúnlerde Ózbekstan delegaciyası Awǵanstannıń Qabul hám Mozori Sharif qalalarında bolıp tur.

Usı sapar etiw sheńberinde “Made in Uzbekistan” sawda úyiniń saltanatlı ashılıw máresimi ótkerildi.

Eki tárep wákilleri hám isbilermenleri qatnasqan bul ilajda Ózbekstanda islep shıǵarılǵan keń túrdegi ónimlerdi Awǵanstan bazarına alıp kiriw hám bul jerdegi talaptı qaplawda usı sawda úyiniń úlken áhmiyetke iye ekeni atap ótildi.
Ilaj sheńberinde qatnasıwshılardıń itibarına keń túrdegi elektrotexnika ónimleri hám jańa texnologiyalar usınıldı.
Qánigelerdiń atap ótiwinshe, bul sawda úyiniń ashılıwı tárepler arasındaǵı óz-ara baylanıslardı bekkemlep, sawdanı jáne de rawajlandırıwǵa xızmet etedi. Bul jerde elektrotexnika ónimleri hám jańa texnologiyalar turaqlı túrde kórsetilip, jergilikli qarıydarlar menen tikkeley sawda baylanısların jolǵa qoyıw imkaniyatı jaratıladı.
Sonday-aq, sapar sheńberinde “Ózeltexsanaat” associaciyasınıń wákilleri Qabul qalasında elektrotexnika sanaatı tarawında jedel sóylesiwler alıp bardı. Ushırasıwlarda tikkeley sawda kelisimlerin dúziw, birge islesiwdi bekkemlew hám uzaq múddetli joybarlardı ámelge asırıw máseleleri dodalandı. Awǵanstan bazarınıń talapların tereń tallawǵa ayrıqsha itibar qaratıldı.
Birlespe málimleme xızmetiniń málim etiwinshe, jańa sawda imkaniyatları Ózbekstan ónimleriniń eksport potencialın arttırıw, olardı jergilikli bazar talaplarına beyimlestiriw hám eki tárepleme ekonomikalıq birge islesiwdi bunnan bılay da bekkemlew imkaniyatların jaratadı.
Esletip ótemiz, delegaciyanıń ámeliy saparı erteń juwmaqlanadı.

N.Ziyodullaeva tayarladı, ÓzA