Ózbekstan Respublikası Prezidenti Shavkat Mirziyoev Rossiya Federaciyası Prezidenti Vladimir Putinniń mirát etiwine bola 9-may kúni Ekinshi jer júzilik urıstaǵı Jeńistiń 80 jıllıǵına baǵıshlanǵan saltanatlı ilajlarda qatnastı.

Qızıl maydanda Jenis paradı bolıp ótti. Ilajda Qıtay Baslıǵı Si Czinpin, Braziliya Prezidenti Lula da Silva, Egipet Prezidenti Abdulfattoh as-Sisi, Belarus Prezidenti Aleksandr Lukashenko, Qazaqstan Prezidenti Qasım-Jomart Toqaev, Qırǵızstan Prezidenti Sadir Japarov, Tájikstan Prezidenti Emomali Rahmon, Túrkmenstan Prezidenti Serdar Berdimuhamedov, Mangoliya Prezidenti Uxnaagiyn Xurelsux, Kuba Prezidenti Migel Dias-Kanel, Venesuela Prezidenti Nikolas Maduro hám basqalar da qatnastı.
Ekinshi jer júzilik urıstaǵı jeńis millionlaǵan insanlardıń mártligi, erligi hám pidayılıǵınıń nátiyjesi bolıp esaplanadı. Bul ullı maqsetke erisiwde kóp milletli Ózbekstan xalqınıń da salmaqlı úlesi bar.
Urıs baslangan waqıtta respublikamız xalqı 6 millionnan aslam edi. Urıs jıllarında eki millionǵa shamalas ózbekstanlı frontqa jiberildi. 538 mıńnan aslam adam sawash maydanlarında qaytıs boldı, 158 mıńnan aslamı biydárek joǵaldı.
Kórsetken mártligi hám erligi ushın Ózbekstannan 214 mıńnan aslam ásker hám oficer jawıngerlik orden hám medallar menen sıylıqlandı. Watanlaslarımızdan 301 adam Sovet Awqamı Qaharmanı ataǵına miyasar boldı, jáne 70 adam “Shuhrat» ordeniniń barlıq dárejeleriniń iyesi boldı.
Ózbek xalqı miynet etiwde de úlken mártlik kórsetti. Mámleketimiz fronttıń isenimli tayanıshına aylandı: bul jerden azıq-awqat, kiyim-kenshek, dári-dármaq, qural-jaraq hám basqa da zárúr resurslar úzliksiz jiberilip turıldı. Qısqa múddette Ózbekstan aymaǵında 170 ten aslam evakuaciyalanǵan kárxanalar jaylastırılǵanı qorǵanıw sanaatınıń irkinishsiz islewin támiyinledi.
Sol awır jıllarda Ózbekstan xalqı joqarı adamgershilik úlgisin kórsetip, front aldı aymaqlarınan evakuaciya etilgen 1,5 millionnan aslam adamdı, sonıń ishinde, 250 mıńnan aslam jetim balalardı qabıl etti.
Ózbek xalqınıń urıs jıllarındaǵı mártligi xalıqaralıq jámiyetshilik tárepinen tán alınbaqta.
Mámleketimizde de urıs hám miynet frontı qatnasıwshılarınıń esteligin máńgilestiriw, veteranlardı sociallıq qollap-quwatlawǵa ayrıqsha itibar qaratılmaqta. Tashkentte sawlatlı «Jeńis parki» estelik kompleksi qurıldı.
Jeńis paradınıń juwmaǵında Ózbekstan Prezidenti Shavkat Mirziyoev Rossiya Federaciyası Prezidenti Vladimir Putin hám basqa da mámleket basshıları menen birgelikte Aleksandr baǵındaǵı Belgisiz ásker qábirine gúl qoydı.
Bul estelik jeńis jolında teńsiz mártlik úlgisin kórsetken hám janın pidá etken millionlaǵan jawıngerler, sonıń ishinde, Ózbekstan perzentleriniń esteligine ornatılǵan.
Máresim bir minutlıq únsizlik, húrmetli qarawıl hám áskeriy orkestrdiń saltanatlı júrisi menen juwmaqlandı.
Moskva qalasındaǵı ilajlar sheńberinde Ózbekstan Respublikası Prezidenti Shavkat Mirziyoev hám Rossiya Federaciyası Prezidenti Vladimir Putinniń ushırasıwı bolıp ótti.
Sóylesiw aldında mámleket basshıları Jeńistiń 80 jıllıǵı múnásibeti menen bir-birin qızǵın qutlıqladı.
Ózbekstan – Rossiya keń kólemli strategiyalıq sheriklik hám awqamlaslıq qatnasıqların bunnan bılay da keńeytiw hám bekkemlew, sonıń ishinde, Rossiya Prezidentiniń ótken jılı may ayındaǵı Ózbekstanǵa saparı dawamında erisilgen kelisimlerdi ámelge asırıw máseleleri kórip shıǵıldı.
Sawda-ekonomikalıq hám investiciyalıq birge islesiwdiń pátin saqlap qalıwǵa qaratılǵan muwapıqlastırılǵan ilajlardı qabıl etiw áhmiyetli ekeni atap ótildi.
Ekonomikanıń tiykarǵı tarmaqlarındaǵı joybarlardı tayarlaw hám ámelge asırıwdı jedellestiriw, sonday-aq, aymaqlar arasındaǵı kooperaciyalıq baylanıslardı xoshametlewge ayrıqsha itibar qaratıldı.
Gumanitarlıq almasıwlar, bárinen burın, mádeniyat, kórkem óner, ilim hám bilimlendiriw tarawlarında nátiyjeli bolıp atırǵanı úlken qanaatlanıwshılıq penen atap ótildi.
Ózbekstan hám Rossiya jetekshileri xalıqaralıq áhmiyetke iye máseleler boyınsha da pikir alıstı.
Sonıń menen Ózbekstan Respublikası Prezidenti Shavkat Mirziyoevtiń Moskva qalasına ámeliy saparı juwmaqlandı. “Vnukovo” xalıqaralıq aeroportında joqarı mártebeli miymandı Rossiya rásmiyleri shıǵarıp saldı.

ÓzA