Prezident Shavkat Mirziyoev Jeńis parkindegi “Millet pidayıları” qıyabanında boldı.

Mámleketimiz basshısınıń ideyası tiykarında shólkemlestirilgen bul estelik ǵárezsizlik jıllarında elimizdi qorǵaw jolında qaytıs bolǵan áskeriy xızmetkerler hám huqıq qorǵaw uyımları xızmetkerleriniń esteligine baǵıshlanǵan.
Kompleks joqarıdan qaraǵanda mámleketimiz bayraǵındaǵı yarım ay hám on eki juldız túrinde kórinedi. Derlik eki metrlik juldızlardıń qırları jazıw tası wazıypasın da atqaradı. Olardıń qaptal táreplerine 196 qaharmanlarımızdıń atı altın háripler menen jazılǵan. Bul jazıwlardıń janına monitorlar ornatılǵan bolıp, millet pidayıları haqqındaǵı maǵlıwmatlar foto hám videolar arqalı kórsetip barıladı. Yaǵnıy, olardıń tek ǵana atı emes, balalıǵı, arzıw-niyetleri, jumısı hám shańaraǵı kóz aldımızda janlanadı.
Bayraǵımızdaǵı yarım ay kishigirim amfiteatr formasında qıyabanǵa sulıwlıq baǵıshlaǵan. Onıń tóbesinen páklik tımsalı – suw aǵıp turadı. Aydıń artqı tárepindegi músinshilik kompoziciyası kórkem ideyaga juwmaq jasaǵan. Onıń orayında perzentin áskeriy xızmetke shıǵarıp salǵan ata-ananıń kelbeti sáwlelendirilgen. Eki qaptalında Qorǵanıw, Ishki isler hám Ayrıqsha jaǵdaylar ministrlikleri, Joqarı sud hám prokuratura, Mámleketlik qáwipsizlik xızmeti, Bajıxana komiteti, Milliy gvardiya sıyaqlı strukturalardıń xızmetkerleri sáwlelendirilgen.
Prezidentimiz bul jerde qaytıs bolǵan áskeriy xızmetkerlerdiń shańaraq aǵzaları menen ushırastı.
– Hár jılı bul jerge kelip, Ekinshi jer júzilik urıstaǵı joǵaltıwlardı esleymiz. Endi ǵárezsizlik pidayılarına baǵıshlanǵan bul kompleksti shólkemlestirgenimiz iygilikli is boldı. Sebebi olar da milliy qaharmanlarımız. Usı jaǵınan, bul maydannıń ruwxıy áhmiyeti úlken. Bul da ózlikti ańlaw, bul da insan qádiri, – dedi Shavkat Mirziyoev.
Mámleketimiz basshısı watan qorǵawshılarınıń shańaraq aǵzalarına tereń húrmetin bildirdi.
– Bul márt azamatlar qáwipli jaǵdayda ózin oylamay, wazıypasına sadıq qalıp, xalqı ushın janın pidá etken. Házirgi tınıshlıqta, aspanımızdıń ashıqlıǵında olardıń úlesi úlken. Shańaraqları, barlıq jaqınları biliwi kerek, olar aramızda tap tiri sıyaqlı, atı hesh qashan óshpeydi. Bunı mine, usı maydanda mórlep qoydıq. Men olardıń ata-analarına, ómirlik joldaslarına tájim etemen. Perzentleri qaharman atalarına múnásip bolıwın tileymen, – dep atap ótti Prezident.
Millet pidayılarınıń tuwılǵan rayonlarında eslew ilajların ótkeriw, olardıń mártligin jaslarǵa órnek etip kórsetiw, qaharmanlıqları haqqında shıǵarmalar jazıw zárúr ekenligi atap ótildi.
Prezident Shavkat Mirziyoev Ekinshi jer júzilik urıs hám miynet frontı qatnasıwshıların da zıyarat etip, bayram menen qutlıqladı.
– Bárinen burın, sizlerdi, sizler arqalı barlıq veteranlarımızdı Jeńistiń 80 jıllıǵı menen qutlıqlayman. Xalqımız atınan bársheńizge tereń minnetdarshılıq bildiremen. Sizlerdiń qaharmanlıǵıńız sebepli búgingi áwladlar usınday tınıshlıq-paraxatshılıqta jasamaqta. Bul tınıshlıqtıń qádirin jaslarımızǵa sizler arqalı jetkeriwimiz kerek. Ómirińizdiń ózi bizge úlgi. Hár bir gápińiz júdá úlken tálim, bilim. Ilayım, densawlıǵıńız bekkem bolıp, kóp jıllar maqtanıshımız, pátiya beriwshimiz bolıp júriń, – dep tilek bildirdi Shavkat Mirziyoev.
Ózbekstan Respublikası Prezidentiniń 19-fevraldaǵı qararına muwapıq, urıs hám miynet veteranlarına múnásip húrmet kórsetilmekte. Ekinshi jer júzilik urıs qatnasıwshıları hám mayıplarına 10 mıń AQSh dolları muǵdarında, usı kategoriyaǵa teńlestirilgen shaxslarǵa 25 million sum, miynet frontı qatnasıwshılarına 3 million sumnan bir mártelik aqshalay sıylıqlar berilmekte. Kóplegen húrmetli nuranıylarǵa “Ekinshi jer júzilik urıstaǵı jeńistiń 80 jıllıǵı” yubiley medalları tapsırılmaqta.
Urıs veteranları hám mayıpları ushın medicinalıq hám sociallıq xızmetler, sonıń ishinde, patronaj xızmeti kórsetilmekte. Olar óz qálewleri boyınsha sanatoriylarda emlenbekte.
Tiyisli ministrlikler, uyımlar hám shólkemler, áskeriy bólimler basshılarınıń qatnasıwında urıs hám miynet veteranları, ǵárezsizlik jıllarında xızmet wazıypasın orınlaw waqtında qaytıs bolǵan áskeriy xızmetkerler hám huqıq qorǵaw uyımları xızmetkerleriniń shańaraq aǵzalarınıń halınan xabar alınıp, jumıslarına járdem berilmekte.

ÓzA