Kembridj universiteti ilimpazları ruwxıy kesellikleri bolǵan jaslar sociallıq tarmaqlarda kóbirek waqıt ótkeretuǵının hám bunday mashqalalarǵa dus kelmeytuǵınlarǵa salıstırǵanda hár qıylı sezimlerge iye bolatuǵının anıqladı. Bul, ásirese, depressiya sıyaqlı “ishki” keselliklerge shatılǵan jas óspirimlerge tiyisli. Bul óspirimler ózlerin basqalar menen salıstırıw, unatıwlar hám pikirler sebepli keypiyat ózgeriwi hám Internette ótkergen waqtın ózin-ózi qadaǵalay almawınan shaǵım etiw itimalı kóbirek. Jumıs Nature Human Behaviour (NHB) jurnalında basıp shıǵarıldı.

Izertlew 11 jastan 19 jasqa shekemgi 3340 jas óspirimniń qatnasıwında ótkerilgen sorawnama maǵlıwmatlarına tiykarlanadı. Ol birinshi bolıp sociallıq media is-háreketlerin úyreniw ushın ruwxıy salamatlıqtı klinikalıq bahalawdan paydalangan. Málim bolıwınsha, ruwxıy kemshiligi bar jas óspirimler sociallıq tarmaqlarda salamat jaslarǵa qaraǵanda kúnine ortasha 50 minut kóbirek waqıt ótkeredi.
Sociallıq tarmaqlar, ásirese, ishki kesellikleri bar jas óspirimlerge kúshli tásir etedi. Olar basqalardan kóbirek ózlerin basqalar menen salıstırıwı hám Internettegi “dosları” sanınan narazı bolıwı haqqında shaǵım etedi. Ilimpazlardıń atap ótiwinshe, bunday sociallıq salıstırıwlar, ásirese, ruwxıy salamatlıq penen baylanıslı mashqalalardan qıynalıp atırǵanlar ushın isenimsizlik hám biykarlaw sezimlerin kúsheytiwi múmkin.
“Bul izertlew sebep hám tásirdi anıqlamaydı, biraq ruwxıy salamatlıq jaǵdayı bolǵan jas óspirimler sociallıq tarmaqlardan basqasha paydalanatuǵının kórsetedi,” dedi izertlewdiń jetekshi avtorı Luiza Fassi.
Ilimpazlardıń pikirinshe, ruwxıy kesellikler óspirimlerdiń Internettegi minez-qulıqların ózgertiwi múmkin hám itimal sociallıq tarmaqlardıń ózi olardıń jamanlasıwına járdem beredi.

Qaraqalpaqstan xabar agentligi