Ekinshi jer júzilik urıstıń tamam bolganına 80 jıl boldı. Sonsha waqıt ótse de onıń tariyxı, qayǵı hám músiybetleri umıtılmaydı. Kerisinshe, urıstıń ayanıshlı aqıbetleri, tınıshlıq-tatıwlıqtıń qádirin eske túsiredi. 9-may – Eslew hám qádirlew kúni tiykarında mine, usınday mazmun jámlengen.

Prezident Shavkat Mirziyoev usı sáne múnásibeti menen Jeńis parkine barıp, eslew máresiminde qatnastı.
Baǵ boylap muńlı nama taraladı. Bul jerdegi hár bir estelik, tımsal hám jazıwlar qorqınıshlı urıs haqıyqatlıqların sáwlelendiredi, xalqımızdıń jeńiske qosqan úlken úlesin atap ótedi. Baǵ búgingidey bayram kúnlerinde, ásirese, kóp boladı.
Keyingi jıllarda qáliplesken dástúrge muwapıq, mámleketimiz basshısı “Mártlik gimni” esteligine gúl qoydı. Bul sawlatlı estelik urısta xalqımız shekken azap-aqıretler, mártlik hám joǵaltıwlardıń kórinisi bolıp esaplanadı.
Hújjetlerdiń kórsetiwinshe, fashizmge qarsı qanlı sawashlarda sol waqıtta 6 million 800 mıńdı quraǵan xalqımızdıń derlik 2 millionı qatnasqan. Sonnan 540 mıńǵa shamalası qaytıs bolǵan, 158 mıńı biydárek joǵalǵan, 50 mıńnan aslamı konclagerlerde misli kórilmegen qıynaw hám azaplar sebepli qaytıs bolǵan, 60 mıńnan aslamı mayıp bolıp qaytqan.
Ózbekstanlı ásker hám oficerlerden 214 mıńǵa shamalası jawıngerlik orden hám medallar menen sıylıqlanǵanı olardıń mártliginen dárek beredi.
Mámleketimiz urıs jıllarında fronttıń bekkem támiynat bazasına aylanǵan, sawash maydanlarına oǵada úlken muǵdarda áskeriy texnika, qural-jaraq, kiyim-kenshek hám azıq-awqatlar jetkerip turılǵan. Oǵada awır sharayatqa qaramastan, xalqımız urıs aymaqlarınan kóshirip kelingen 1 million 500 mıńǵa shamalas adamdı, sonıń ishinde, ata-anasınan ayırılǵan 250 mıń jetim balanı óz qushaǵına alıp, mehir kórsetken.
Bular haqıyqıy mártlik hám qaharmanlıq jılnaması bolıp esaplanadı. Bunday quramalı hám dańqlı jeńiske múnásip úles qosqan márt xalqımız benen hár qansha maqtansaq, arzıydı. Bul qaharmanlıqlardı hesh qashan umıtpawımız, jaslarımızǵa jetkeriwimiz kerek. Ásirese, házirgi qáweterli zamanda bunıń áhmiyeti oǵada úlken. Hámmemiz watan qorǵawǵa hár kúni tayar bolıwımız kerek, – dedi Shavkat Mirziyoev.
Ózbekstan Respublikası Prezidentiniń 19-fevraldaǵı qararına muwapıq, Ekinshi jer júzilik urısta erisilgen jeńistiń 80 jıllıǵı hám Eslew hám qádirlew kúni múnásip belgilenbekte. Búgingi áwladlardıń tınıshlıǵı, mámleketimizdiń turaqlılıǵı ushın janın pidá etken insanlardıń esteligi húrmet penen eske alınbaqta. Házirgi waqıtta bar bolǵan miynet veteranları hám kekselerge húrmet kórsetilmekte.
Ilajda Ózbekstan Qurallı Kúshleri, mámleketlik hám jámiyetlik shólkemlerdiń wákilleri, máhálle belsendileri hám nuranıylar da qatnasıp, bul estelikke gúller qoydı.
Mámleketimiz basshısı baǵda ornatılǵan “Eslew nurı” kompoziciyasın da kózden ótkerdi. Ol Ekinshi jer júzilik urıs hám front artında miynet etken ózbekstanlı qaharmanlardıń esteligine baǵıshlap qurılǵan. Monument párwaz etip atırǵan eki qus kórinisinde bolıp, úlken hám jas áwladlar arasındaǵı miyrasxorlıqtı sáwlelendiredi.
Shıǵarma tariyxıy miyras hám zamanagóy kórkem ónerdi ózinde jámlegen. Oǵan QR-múrájat ornatılǵan bolıp, keliwshiler kompleks hám urıs qaharmanları haqqında oqıwı, “Eslew nurı” kitabın júklep alıwı múmkin.

ÓzA