Usı jıldıń 6-may kúni Oliy Majlis Senatınıń Baslıǵı Tanzila Narboeva Polsha Respublikası parlamenti Senatı Baslıǵınıń orınbasarı Mixal Kaminskiy menen ushırastı.

Sóylesiw barısında Ózbekstan-Polsha qatnasıqlarınıń jaǵdayı hám olardı rawajlandırıw perspektivaları, sonıń ishinde, parlamentleraralıq birge islesiwdi keńeytiw, jańa mazmun menen bayıtıw, nızam dóretiwshiligi hám parlamentlik qadaǵalaw tarawında óz-ara tájiriybe almasıwdı jedellestiriw máseleleri dodalandı.
Sóylesiw dawamında Ózbekstan hám Polsha arasındaǵı parlamentleraralıq sóylesiw basqıshpa-basqısh rawajlanıp atırǵanı qanaatlanıwshılıq penen atap ótildi. Eki mámleket nızam shıǵarıwshı uyımları arasında tiykarǵı baǵdarlarda birge islesiwdi bunnan bılay da tereńlestiriwden mápdar ekeni atap ótildi. Parlamentlerdegi doslıq toparlarınıń jumısına, sonday-aq, eki tárepleme qatnasıqlardı bekkemlewdiń áhmiyetli quralı sıpatında parlament delegaciyalarınıń turaqlı sapar etiwleri almasıwlarına ayrıqsha itibar qaratıldı.
Sonday-aq, joqarı bilimlendiriw, mádeniyat, turizm, densawlıqtı saqlaw hám awıl xojalıǵı sıyaqlı tarawlardaǵı birge islesiwdiń eki tárepleme bekkem tiykarların qáliplestiriw máseleleri boyınsha pikir alısıldı. Tárepler studentler arasında tájiriybe almasıw, qánigelerdiń mamanlıǵın arttırıw máseleleri, sonday-aq, eki mámleket arasında gumanitarlıq baylanıslardı bekkemlewge qaratılǵan birgeliktegi bilimlendiriw baǵdarlamaları hám joybarların ámelge asırıw imkaniyatlari dodalandı.
Ushırasıw juwmaqları boyınsha parlamentleraralıq baylanıslardı turaqlı túrde dawam ettiriwge kelisip alındı.

ÓzA