Qıtaydıń Xubey provinciyasındaǵı Yanczi dáryasında qurılǵan «Úsh say» bógeti dúnyadaǵı eń úlken gidroelektr stanciyası bolıp esaplanadı. 2012-jılı juwmaqlanǵan bul qurılıstıń uzınlıǵı 2335 metr, biyikligi 185 metr bolıp, ol 40 kub.km (38 trillion litr) suwdı teńiz qáddinen 175 metr biyiklikte saqlaydı.

NASA wákili doktor Benjamin Fong CHao basshılıǵındaǵı qánigeler bóget jerge fizikalıq tásir kórsetkenin anıqladı. Massanıń úlken kólemde bir orında toplanıwı Jerdiń aylanıwına tásir etip, kúndi 0,06 mikrosekundqa uzayttı hám Jer kósherin 2 santimetrge jılıstırdı. Bul ózgerisler júdá kishi bolsa da, zamanagóy ilimiy úskeneler menen anıqlanıwı múmkin. «Úsh say» bógeti insan qurılısı arqalı planetanıń fizikasına tásir etken siyrek ushırasatuǵın jaǵdaylardan biri bolıp esaplanadı.

Qaraqalpaqstan xabar agentligi