Islam birge islesiw shólkemi málimleme agentlikleri awqamı UNA-OICnıń xabar beriwinshe, Qatar paytaxtı Doxa qalasında Xalıqaralıq Islam fiqhi akademiyası (IIFA) konferenciyasınıń 26-sessiyası jumıs basladı. Bes kún dawam etetuǵın ilajdı Vaqflar hám islam isleri ministri Ǵanim bin Shahin bin Ǵanim Al-Ǵanim ashıp berdi.

IBSh Bas xatkeri Husayn Ibrohim Toha akademiyanıń jámáátlik ijtihadtı bekkemlewdegi ayrıqsha ornın atap ótip, jámiyettegi mashqalalardı sheshiwde fiqhiy birge islesiw de áhmiyetli ekenligin atap ótti.
Akademiyanıń Bas xatkeri professor Qutb Mustafo Sano sessiyalar ushın tańlanǵan temalarǵa toqtap ótti. Haqıyqatlıqqa, adam hám jámiyet turmısına tereń tásir kórsetiwi múmkin bolǵan jasalma intellekt, elektron oyınlar boyınsha húkim hám qadaǵalaw, shariyatta psixologiyalıq hám ruwxıy keselliklerdiń huqıqıy uqıplılıqqa tásiri, islam qarjı institutlarında sháriyat basqarıwı sıyaqlı áhmiyetli máseleler dodalanıp, pikir-talaslar bolıp ótetuǵını atap ótildi.
Konferenciyaǵa dúnyanıń 60 mámleketinen kelgen 230 ǵa shamalas ilimpaz hám ekspert óz ilimiy-izertlew jumısları menen qatnaspaqta.
Sonday-aq, sessiya dawamında IBShǵa aǵza mámleketler hám pútkil dúnya musılmanların qızıqtırǵan zamanagóy huqıqtanıwǵa baylanıslı, intellektuallıq, medicinalıq, sociallıq hám ekonomikalıq temalar da kóteriledi. Atap aytqanda, bala tárbiyasında júzege kelip atırǵan mashqalalar, jasalma intellektten paydalanıw tártibi, etikası, úshinshi adamnan alınǵan qarızdıń kóbeyiwi hám tóleniwi boyınsha Islam húkimi, kepillik xatı hám hújjetli akkreditiv ushın haqı alıw húkimi sıyaqlı kópshilikti qızıqtıratuǵın temalar qánigelerdiń dıqqat orayında boladı.
Xalıqaralıq islam fiqhi akademiyası keńesi qarar qabıl etiwshiler, jetekshiler hám oyshıllarǵa jol-joba kórsetiwge járdem beretuǵın usınıslardı islep shıǵadı. Tiykarǵı hám innovaciyanı jámlestirgen tártipli ilimiy kózqaras sheńberinde zamanagóy mashqalalardı sheshiw boyınsha jámiyetlik institucionallıq ijtihadtıń áhmiyetin atap ótedi.

Qaraqalpaqstan xabar agentligi