Prezident Shavkat Mirziyoev 5-may kúni perspektivalı kadrlardı maqsetli tayarlaw hám qánigelerdiń sırt elde bilim alıwın qollap-quwatlawǵa baylanıslı usınıslardıń prezentaciyası menen tanıstı.

Mámleketimizde hár bir tarawdı rawajlandırıwda kadrlar máselesine ayrıqsha itibar qaratılmaqta. Jaslardıń oqıwı, qánigelerdiń tájiriybe arttırıwı mámleket tárepinen qollap-quwatlanbaqta.
Usı maqsette «El-yurt umidi» qorı tárepinen 2 mıń 225 stipendiat 45 ke shamalas mámleketke oqıwǵa jiberilip, byudjetten jámi 1,5 trillion sum qaratıldı. Házirgi waqıtqa shekem olardıń 1 mıń 400 i Ózbekstanǵa qaytıp, ekonomika tarmaqlarında, bilimlendiriw, ilim, medicina hám mámleketlik basqarıwda jumıs islemekte. Búgingi kúnde 748 stipendiat «TOP-300» dizimindegi abıraylı universitetlerde bilim almaqta.
Endi bunday jumıslardıń kólemin bunnan bılay da keńeytiw maqsetinde bul fondtı Ózbekstan Respublikası Prezidenti janındaǵı Perspektivalı kadrlardı tayarlaw boyınsha «El-yurt umidi» qorı etip, Mámleketlik basqarıw akademiyasın Ózbekstan Respublikası Prezidenti janındaǵı Mámleketlik siyasat hám basqarıw akademiyası etip qayta shólkemlestiriw názerde tutılmaqta. Olar Mámleketlik xızmetti rawajlandırıw agentligi menen birgelikte kadrlar tayarlaw klasterine aylandırıladı.
Sonıń ishinde, perspektivalı qánigelerdi sırt elde tayarlaw boyınsha bakalavriat, magistratura hám doktorantura menen bir qatarda mámleketlik xızmetkerler altı ayǵa shekem maqsetli stajirovkaǵa jiberiledi. Onda energetika, urbanizaciya, transport, arxitektura, geodeziya, jer qatnasıqları, texnika, injenerlik sıyaqlı ekonomikanıń drayver tarawlarına, mámleketlik basqarıw hám áhmiyetli sociallıq baǵdarlarǵa ústinlik beriledi.
Xalıqaralıq reytinglerde «TOP-100»lik universitetlerge grant tiykarında oqıwǵa kirgen talabanlarǵa «El-yurt umidi» stipendiyası imtixanlarsız ajıratıladı. «TOP-300» dizimindegi universitetlerge grantqa kirgenlerge xalıqaralıq transport hám turaq jay qárejetleri imtixanlarsız qaplap beriledi. «TOP-20»lıqtaǵı universitetlerdiń bakalavriatına 50 procent grant tiykarında qabıl etilgen Prezident mektepleriniń pitkeriwshilerine stipendiyalar tańlawlarsız ajıratıladı.
Sırt elde oqıp atırǵan watanlaslarımız benen turaqlı baylanısta bolıw, olardıń talapların anıqlaw hám tálim-tárbiya processlerinde járdemlesiw maqsetinde «El-yurt umidi» qorı stipendiantlarınıń ata-analar keńesi dúziledi. Elshixana hám konsullıqlarǵa studentlerge huqıqıy hám shólkemlestiriwshilik járdem kórsetiw wazıypaları júklenedi.
Zaman talaplarına say qánigeler tayarlawda Mámleketlik siyasat hám basqarıw akademiyasınıń da ornı úlken. Ol jerde «Hákimler mektebi», «Basshı hayal-qızlar mektebi», «Keleshek liderleri» sıyaqlı kurslarda aldınǵı bilimlendiriw baǵdarlamaları jolǵa qoyılǵan. Ótken oqıw jılında 13 mıńnan aslam tıńlawshılardıń mamanlıǵı arttırılǵan.
Jańa sistemaǵa tiykarlanıp, endi mámleketlik xızmetkerler ushın 3 baǵdarlama – mamanlıq arttırıw, qayta tayarlaw hám magistratura jolǵa qoyıladı. Barlıq uzaq hám orta múddetli oqıwlar sırt elli birge islesiwshiler menen birgeliktegi bilimlendiriw baǵdarlamaları hám Ekonomikalıq birge islesiw hám rawajlanıw shólkeminiń tayanısh usınısları tiykarında shólkemlestiriledi.
Magistraturada «Mámleketlik basqarıw», «Mámleketlik siyasat», «Aymaqlardı kompleksli rawajlandırıw», «Insan resursların rawajlandırıw» hám «Mámleketlik qarjılardı basqarıw» baǵdarlarında 18 ayǵa shekemgi múddette tereńlestirilgen bilimler beriledi. Mámleketlik buyırtpadan tısqarı tólemli-kontrakt túrinde de talabanlar qabıl etiledi.
Akademiyada bilimlendiriw baǵdarlamaları hám ilimiy izertlewlerdiń sapasın arttırıw boyınsha usınıslar beriw, abıraylı sırt el ilimiy-bilimlendiriw mákemeleri menen birge islesiw ornatıw ushın Xalıqaralıq akademiyalıq másláhát keńesi dúziledi.
Sonday-aq, akademiya janında 4 jańa oray shólkemlestirilmekte. Mısal ushın, Mámleketlik basqarıw mashqalaların ilimiy-ámeliy izertlew orayı mámleketlik xızmettiń nátiyjeliligin arttırıw, jeke menshik sektordaǵı aldınǵı ámeliyatlardı mámleketlik basqarıwda engiziwge qaratılǵan usınıslar berip baradı.
Prezidentimiz usınıslardı maqullap, bul sistemalardı jańasha qatnaslar tiykarında engiziw, qor hám akademiya xızmetkerleriniń mamanlıǵın arttırıw boyınsha kórsetpeler berdi. Qábiletli jaslardı turaqlı izlep tabıw hám joqarı dárejede oqıtıw, maman qánigelerdi reformalarǵa tartıw áhmiyetli ekenligi atap ótildi.

ÓzA