Korrupciya tek ǵana jámiyette unamsız aqıbetlerge alıp kelmeydi, al mámlekettiń rawajlanıwına úlken tosqınlıq etedi.

Tórtkúl rayonındaǵı “Agrobank” AKB, “Mikrokreditbank” AKB, “Xalıq banki” AKB hám “Ózmilliybank” AJ rayonlıq filiallarında ruwxıy-ádep-ikramlılıq tárbiya jumısları boyınsha nátiyjelilikti arttırıw hám korrupciyaǵa qarsı gúresiw maqsetinde “Korrupciya – rawajlanıwdıń dushpanı” atamasında úgit-násiyat ilajları ótkerildi, – dep maǵlıwmat beredi rayon hákimligi Málimleme xızmeti bólimi.
Ilajda Respublikalıq ruwxıy-ádep-ikramlılıq tárbiya boyınsha basqarması rayonlıq bóliminiń baslıǵı J.Settiev korrupciya hám basqa da unamsız illetlerge qarsı gúresiw, jámiyetshiliktiń pikirin esapqa alıw hám kásiplik etika qaǵıydalarına ámel etiw zárúrligi haqqında aytıp ótti.
Rayon hákiminiń mámleketlik til máseleleri boyınsha másláhátshisi, úgit-násiyatlaw toparınıń aǵzası G.Nazarova bank filiallarında mámleketlik tilge baylanıslı nızamlarǵa ámel etiw áhmiyetli ekenligi haqqında aytıp, bar kemshiliklerdi saplastırıw hám metodikalıq kórsetpelerdi usındı. Bul, óz gezeginde, mámleketlik tildiń ózine tán ornı hám rolin arttırıwǵa xızmet etedi.
Sonday-aq, banklerde ruwxıylıq múyeshlerin bayıtıw maqsetinde Ózbekstan Respublikası Prezidenti Sh.Mirziyoevtiń “Házirgi zaman hám Jańa Ózbekstan” atamasındaǵı kitapları tarqatıldı. Bul kitaplar, xızmetkerlerge ruwxıy hám mánawiy potencialın arttırıwda járdem beredi.

Qaraqalpaqstan xabar agentligi