Prezident Shavkat Mirziyoev 30-aprel kúni mámleketlik emes bilimlendiriw xızmetleri sistemasın jetilistiriw, joqarı hám kásiplik bilimlendiriwde sapanı arttırıw ilajlarınıń prezentaciyası menen tanıstı.

Ekonomika tarmaqlarınıń rawajlanıwı hám Investiciyalıq ortalıq, bárinen burın, kadrlar potencialı menen tıǵız baylanıslı. Sonıń ushın joqarı hám kásiplik tálim sisteması turaqlı jetilistirip barılmaqta.
Sońǵı jılları bilimlendiriw tarawında jeke menshik sektorǵa berilgen imkaniyatlar sebepli 71 jeke menshik joqarı oqıw ornı hám 51 jeke menshik texnikum shólkemlestirilip, olarda 500 mıńǵa shamalas student hám oqıwshılar oqımaqta. Sonıń nátiyjesinde mámlekette joqarı bilimlendiriw menen qamtıp alıw 9 procentten 42 procentke arttı.
Álbette, házirgi kúnge shekem ámelge asırılǵan jumıslar kóplegen jaslardıń kásiplik hám joqarı maǵlıwmat alıwına imkaniyat jaratadı. Biraq, mámleketlik emes bilimlendiriw shólkemleriniń bárshesinde de bilimlendiriwdiń sapası birdey támiyinlenbegen.
Mámleketlik emes bilimlendiriw shólkemlerinde qabıllaw parametrleri, bilimlendiriw baǵdarlamaları, oqıw processleri hám ilimiy imkaniyattı sapa jaǵınan jaqsılaw, olardı zamanagóy miynet bazarı talaplarına beyimlestiriw eń tiykarǵı máselelerden biri bolıp esaplanadı.
Sonıń ushın prezentaciyada mámleketlik emes bilimlendiriw xızmetlerin kórsetiwdi tártipke salıw, licenziyalaw sistemasın jetilistiriw hám mámleketlik akkreditaciyadan ótkeriw boyınsha jańa sistemanı engiziwge qaratılǵan usınıslar dodalandı.
Bul baǵdarda aldıńǵı sırt el tájiriybeleri tiykarında eki basqıshlı licenziyalaw sistemasına ótiw, bilimlendiriw baǵdarlamaların arnawlı akkreditaciyadan ótkeriw hám hár bes jılda kompleksli mámleketlik akkreditaciyanı shólkemlestiriw boyınsha usınıslar bildirildi.
Sonday-aq, prezentaciyada rawajlanǵan mámleketlerdiń eń aldıńǵı tájiriybesinen kelip shıqqan halda, bilimlendiriwdiń sapasın sırtqı bahalaw menen shuǵıllanıwshı ayrıqsha erkin struktura shólkemlestiriw hám sapa qadaǵalawınıń ashıq-aydın, ádil hám hadal sistemasın engiziw baslaması da alǵa qoyıldı.
Bilimlendiriwdiń sapasın támiyinlew hám sırtqı bahalawdıń engiziliwi kásiplik hám joqarı bilimlenrdiriw mákemelerinde oqıtıw nátiyjeliligin hám ilimiy imkaniyattı arttırıp, olardıń xalıqaralıq reytinglerdegi ornın jaqsılawǵa xızmet etedi.

ÓzA