Ózbekstan texnikalıq jaqtan tártipke salıw agentligi hám «BYD Uzbekistan Factory» JShJ qospa kárxanası birgelikte ǵalaba xabar quralları ushın press-tur shólkemlestirdi.

Bizge belgili, mámleketimiz basshısınıń ótken jılı 18-marttaǵı tiyisli qararına muwapıq, Jizzaq wálayatında «BYD Uzbekistan Factory» JShJ qospa kárxanasında gibrid avtomobiller islep shıǵarıw jolǵa qoyılǵan. Bul zavodtıń rásmiy iske túsiriliwi bolsa ótken jılı 27-iyun kúni Prezidentimizdiń saparı dawamında ámelge asırılǵan. Joybardıń ulıwma bahası 160 million AQSh dolların quraydı. Kárxana jılına 50 mıń dana avtomobil islep shıǵarıw quwatlılıǵına iye. Ótken jıl dawamında 60 million AQSh dolları muǵdarında tikkeley sırt el investiciyaları tartılıp, 1300 jańa jumıs ornı jaratıldı. Zavod kepserlew, boyaw hám jıynaw cexları sıyaqlı eń zamanagóy texnologiyalar menen támiyinlengen.
Itibarlı tárepi, zavodta Ǵárezsiz Mámleketlerdiń Doslıq Awqamı aymaǵında birden-bir bolǵan aldınǵı laboratoriya jumıs alıp barmaqta. Sonıń menen birge, lokalizaciyalaw processleri de jedel pátlerde alıp barılmaqta. Respublikadaǵı 7 jergilikli kárxanada 60 qa shamalas komplektlewshi bólekler islep shıǵarılmaqta. Házirgi waqıtta «BYD»diń 8 modeli, «Song Plus DMi», «Song Plus EV», «Chazor», «Song Pro», «Han», «Seagull», «E2» hám «Yuan Up» avtomobilleri Ózbekstan bazarına usınıs etilmekte. Olar jergilikli klimat sharayatlarına beyimlestirilgen bolıp, multimedia sistemasında ózbek hám rus tilleri, aralıqtan basqarıw hám internet imkaniyatları bar. Sonday-aq, mámleket boylap 21 rásmiy dilerlik hám servis orayları arqalı qarıydarlarǵa xızmet kórsetilmekte.
Press-tur dawamında Jizzaq qalasındaǵı «BYD Uzbekistan Factory» kárxanasına ISO 9001:2015 xalıqaralıq sertifikatı tapsırıldı. Bul áhmiyetli waqıya Ózbekstan avtomobil qurılısı tariyxında sapa basqarıwı boyınsha xalıqaralıq standartlarǵa muwapıq jańa basqıshtıń baslanıwın ańlatadı.
Maǵlıwmat ornında aytıw kerek, sertifikat kárxanadaǵı óndiris processleri ISO 9001:2015 «Sapa menedjmenti sisteması» xalıqaralıq standartlarına tolıq juwap beretuǵının tastıyıqlaydı.
Bul bolsa ónimlerdiń sapası boyınsha ishki hám sırtqı bazarlarda isenimdi arttıradı hám eksport potencialın keńeytedi. Sıylıqlaw máresiminde «Bureau Veritas Tashkent» sertifikatlastırıw shólkeminiń basshısı Munira Rasulova shıǵıp sóylep, «ISO xalıqaralıq standartların engiziw – jasıl ekonomika hám turaqlı rawajlanıw principlerine ámel etiw, BYD kompaniyasınıń unamlı imidjin qáliplestiriw, biznes-qáwip-qáterlerdi basqarıw hám birge islesiwshiler hám tutınıwshılardıń isenimin arttırıwǵa xızmet etetuǵının atap ótti.
– Aldımızda turǵan eń áhmiyetli wazıypalardan biri, xalqımızǵa sapalı, zamanagóy hám ekologiyalıq taza transport quralların óz waqtında jetkerip beriw bolıp esaplanadı, – deydi «BYD Uzbekistan Factory» bas direktorı Azizbek Muhitdinov. – Bárinen burın, mámleketimiz basshısı tárepinen bizge bildirilgen isenimdi aqlaymız. «BYD» komandası bul isenimdi aqlaw jolında qısqa waqıtta salmaqlı jumıslardı ámelge asırdı. «BYD Uzbekistan Factory» tárepinen alıp barılıp atırǵan jumıslar mámleketimizde jasıl transport tarawın rawajlandırıw, ekologiyalıq turaqlılıqtı támiyinlew hám innovaciyalıq sanaattı qollap-quwatlaw jolında áhmiyetli basqısh bolıp tabıladı. Keleshekte energetika tarawı, korrupciyaǵa qarsı basqarıw hám avtomobil sanaatına baylanıslı jáne bir qatar xalıqaralıq sertifikatlardı qolǵa kirgiziwdi maqset etkenbiz.

Shahnoza Mamaturopova, ÓzA